Markaziy bankning Bank nazorati qo‘mitasi tomonidan 2025-yilning may oyidagi yig‘ilishlarida (8 marta) 37 ta masala ko‘rib chiqildi va tegishli qarorlar qabul qilindi. Bu haqda MB matbuot xizmati xabar berdi.
Xususan ro‘yxatga olish va ruxsat berish yo‘nalishida 18 ta masala ko‘rib chiqildi. Shu jumladan:
- kredit tashkilotlari ustaviga kiritilgan o‘zgartirishlarni ro‘yxatdan o‘tkazish (3 ta);
- yangi ochilayotgan mikromoliya tashkilotlarini hisob ro‘yxatidan o‘tkazish va chiqarish (4 ta);
- kredit tashkilotlarining ustav fondidagi ulushiga egalik qilish uchun ruxsat berish (4 ta);
- tijorat banklari kuzatuv kengashi va boshqaruvi a‘zolari hamda muhim ahamiyatga ega xodimlarining nomzodlarini ko‘rib chiqish (7 ta).
Shu bilan birga, kredit tashkilotlarining moliyaviy holatiga oid 19 ta masala – Markaziy bankning ko‘rsatmalari va prudensial me‘yorlari talablarining bajarilishi, tijorat banklari va mikromoliya tashkilotlarida o‘tkazilgan inspeksiya natijalari ham muhokama qilindi.
Tijorat banklari ustav kapitalining eng kam miqdorini shakllantirilishi bo‘yicha qonunchilik talablariga rioya qilinmagan va bank boshqaruvi tomonidan muammoli kreditlarni undirish va ular qoldig‘ini kamaytirish yuzasidan hududlarda ishlab chiqilgan reja-grafiklar ijrosi ta‘minlanmagan taqdirda 17 ta tijorat banki chora va sanksiyalar qo‘llanilishi to‘g‘risida ogohlantirildi.
Shuningdek, Markaziy bank tomonidan o‘tkazilgan o‘rganish va inspeksiya tekshiruvlari davomida aniqlangan qoidabuzarliklar uchun 13 ta bankka nisbatan jarima sanksiyasi qo‘llanildi.
Bank nazorati qo‘mitasining navbatdagi yig‘ilishida 17 ta tijorat bankiga nisbatan chora va sanksiyalar qo‘llanilishi hamda 13 ta bank jarimaga tortilishi to‘g‘risida ogohlantirildi.
Markaziy bank 2025-yil aprel oyida 6 ta tijorat bankini jarimaga tortgandi. 2025-yil yanvarida 10 ta bank, fevralda 5 ta bank jarimaga tortilgandi.
Izoh (0)