O‘zbekistonda elektr energiyasi bo‘yicha tadbirkorlarga solinadigan jarimalar miqdori qayta ko‘rib chiqiladi. Bu haqda prezidentning biznes uchun teng sharoit va adolatli raqobat muhitini ta’minlashga qaratilgan farmonidagi “Yo‘l xaritasi”da belgilandi.
Unda tadbirkorlik subyektlari tashabbuslarini amalga oshirish bo‘yicha chora-tadbirlar keltirilgan.
Xususan, elektr energiyasini behuda sarflash, jumladan, undan binolarni yoritish uchun xo‘jasizlarcha foydalanish tushunchasi va tadbirkorlik subyektlari faoliyat turlarining xususiyatini inobatga olib, belgilangan moliyaviy va ma’muriy jarima miqdorlarini qayta ko‘rib chiqish ko‘zda tutilmoqda.
Shuningdek, jarimadan qarzdorligi hisobiga tarmoqdan uzish o‘rniga bo‘lib-bo‘lib to‘lash imkoniyatini nazarda tutish rejalashtirilmoqda.
Shu maqsadda 2025-yil mart oyiga qadar yuqoridagilar ko‘zda tutilgan qonun loyihasi ishlab chiqiladi. Elektr energiyasi, neft mahsulotlari va gazdan foydalanishni nazorat qilish inspeksiyasi, biznes ombudsman, Savdo-sanoat palatasi mas’ul ijrochilar etib belgilandi.
Tadbirkorlarga elektr energiyasi va tabiiy gazga to‘lov qilishda qulayliklar yaratish ham rejalashtirilgan.
Yuridik shaxslarga korporativ kartadan mobil ilovalar orqali elektr energiyasiga to‘lovlarni amalga oshirish tizimini joriy etish ko‘zda tutilmoqda. 2025-yil fevralgacha normativ-huquqiy hujjat loyihasi ishlab chiqilishi lozim. Markaziy bank, Raqamli texnologiyalar vazirligi, “Hududiy elektr tarmoqlari” va “Hududgazta’minot” mas’ul ijrochilar etib belgilandi.
2024-yil noyabrida “O‘zenergoinspeksiya” tomonidan barcha hududlarda isteʼmolchilarning elektr energiyasidan samarali va oqilona foydalanishlarini taʼminlash maqsadida profilaktika tadbirlari o‘tkazildi. O‘rganishlar davomida ayrim iste’molchilarning elektr energiyasini behuda sarflash, ehtiyoj bo‘masa-da shunchaki yoqib qo‘yish kabi holatlari kuzatildi.
Ob-havo haroratining pasayishi natijasida elektr energiyasidan foydalanishga bo‘lgan ehtiyoj ortib boradi. Inspeksiya bunday paytlarda elektr energiyasidan imkon qadar tejamkorlik bilan foydalanishga, zarurat bo‘lmagan hollarda esa, elektr qurilmalarini tarmoqdan ajratib qo‘yishga chaqirib keldi.
Ma’muriy javobgarlik to‘g‘risidagi kodeksning 100-moddasiga ko‘ra, elektr va issiqlik energiyasini behuda sarflash, ya’ni elektr dvigatellaridan, elektr pechlari va boshqa elektr hamda issiqlik uskunalaridan muntazam ravishda, ishlab chiqarish zarurati bo‘lmagan holda to‘liq foydalanmaslik yoki ularni bekorga ishlatib qo‘yish, zichlangan havo, suv va issiqlikning muntazam ravishda nobud bo‘lishi, energiya bilan ta’minlovchi tashkilotlarning ruxsatisiz xizmat binolari va boshqa binolarni isitish uchun, shuningdek ishlab chiqarish jarayonida nazarda tutilmagan boshqa maqsadlar uchun elektr energiyasidan foydalanish, yoritish uchun elektr energiyasidan xo‘jasizlarcha foydalanish mansabdor shaxslarga BHMning 5 baravaridan 15 baravarigacha jarima solishga sabab bo‘ladi.
Izoh (0)