Klublar o‘rtasidagi Jahon chempionatining 1-tur uchrashuvlari yakunlandi. 18-iyundan 19-iyunga o‘tar kechasi so‘nggi uchta bahs bo‘lib o‘tdi.
H guruhidagi asosiy favoritlardan biri hisoblangan “Real Madrid” “Al-Hilol”ga qarshi maydonga tushdi. Qiziqarli o‘tgan bahsda tomonlar 1:1 hisobidagi durangga imzo chekdi.
O‘yindagi hisob 34-daqiqada Gonsalo Garsiya tomonidan ochildi. U chap qanotdan uzatilgan to‘pni ajoyib tarzda Yassin Bunu darvozasiga yo‘lladi. Birinchi bo‘lim oxirida riyodliklar hisobni tenglashtirishga muvaffaq bo‘ldi. Ruben Neves hakam tomonidan belgilangan 11 metrlik jarima zarbasini aniq amalga oshirib, tablodagi natijani 1:1 ko‘rinishiga keltirdi.
Ikkinchi taym ham ancha qizg‘in o‘tdi. Har ikki jamoa hujumkor o‘yin namoyish etdi. Uchrashuv yakuniga yaqin “Real” g‘alabani ilib ketishi mumkin edi, biroq “Al-Hilol”ning marokashlik darvozaboni ajoyib seyv amalga oshirib, jamoasiga 1 ochko taqdim etdi.
H guruhidagi ikkinchi bahs Avstriyaning “Zalsburg” hamda Meksikaning “Pachuka” jamoalari o‘rtasida kechdi. Bellashuv 2:1 hisobida Yevropa vakillari foydasiga hal bo‘ldi.
O‘yindagi hisob birinchi taym oxirida, aniqrog‘i 42-daqiqada “Zalsburg” futbolchisi Oskar Glux tomonidan ochildi. Ikkinchi bo‘limning 56-daqiqasida meksikaliklar hisobni tenglashtirdi. Gol muallifi — Brayan Gonsales. 76-daqiqada Karim Onisivo Avstriya jamoasini hisobda yana oldinga olib chiqdi — 2:1. Mazkur natija o‘yin oxiriga qadar o‘zgarmadi va “Zalsburg” ilk turda g‘alaba qozonib, hisobiga 3 ochko yozib qo‘ydi.
1-turdan so‘ng H guruhidagi holat quyidagicha: “Zalsburg” 3 ochko bilan guruh peshqadami bo‘lib turibdi. 1 ochkodan qo‘lga kiritgan “Real” va “Al-Hilol” mos ravishda ikkinchi hamda uchinchi o‘rinlarni egallagan. “Pachuka” esa ochkosiz holda so‘nggi o‘rinda bormoqda.
G guruhidagi “Al-Ayn” hamda “Yuventus” o‘rtasidagi bahs gollarga boy tarzda kechdi. Uchrashuvda turinliklar 5:0 hisobida g‘alaba qozonib, hisobiga 3 ochko qo‘shib oldi.
Uchrashuvda tezkor gol kiritildi — 11-daqiqada Kolo Muani raqib darvozasini ishg‘ol qilib, jamoasini hisobda oldinga olib chiqdi. 21-daqiqada Fransisko Konseysau Turin klubining ikkinchi golini kiritgan bo‘lsa, 31-daqiqada Kenan Yildiz hisobni 3:0 ko‘rinishiga keltirdi. Birinchi bo‘lim oxirida Kolo Muani “Yuventus”ning to‘rtinchi goliga mualliflik qildi.
Ikkinchi bo‘lim boshida Fransisko Konseysau o‘zining ikkinchi, jamoasining esa beshinchi golini “Al-Ayn” darvozasiga kiritdi — 5:0. Ushbu natija o‘yin oxirigacha saqlanib qoldi va “Yuventus” ilk turda yirik hisobda g‘alaba qozondi.
1-turdan so‘ng G guruhida “Yuventus” to‘plar farqi evaziga peshqadamlik qilmoqda. Yana bir 3 ochkoga ega “Manchester Siti” esa ikkinchi o‘rinni egallab turibdi. “Vidad” va “Al-Ayn” esa mos ravishda so‘nggi ikki o‘rinda qayd etilgan.
Klublar o‘rtasidagi Jahon chempionati
1-tur
H guruhi
“Real” — “Al-Hilol” 1:1
Gollar: 1:0 — Garsiya (34), 1:1 — Nevesh (41, penalti).
“Pachuka” — “Zalsburg” 1:2
Gollar: 0:1 — Oskar (42), 1:1 — Gonsales (56), 1:2 — Onisivo (76).
G guruhi
“Al-Ayn” — “Yuventus” 0:5
Gollar: 0:1 — Kolo-Muani (11), 0:2 — Konseysau (21), 0:3 — Yildiz (31), 0:4 — Kolo-Muani (45+4), 0:5 — Konseysau (58).
Izoh (0)