Aktyor Talʼat Yo‘ldoshev YouTube’dagi “Daryo lifestayle” kanaliga bergan intervyusida ayolidan minnatdorligi va farzandsizlik bilan sinalayotgani haqida gapirdi.
“Ayolim aktyor ekanligimni bilmagan”
— Ayolim bilan tanishuvimiz juda qiziq kechgan. Farg‘onaga gastrolga borganimizda uni uchratib qolganman. U paytlarda o‘zimni juda taniqli inson deb bilardim. Ayolimning “Nima ish qilasiz?”, degan gapi meni esankiratib qo‘ygan. Nima deyishni bilmay o‘zimni futbolchi deb tanishtirganman. Munosabatlar jiddiylashib, uyiga sovchi jo‘natishimga yaqin suratimni ukasiga ko‘rsatib “Bu futbolchini taniysanmi?”, deb so‘rabdi. Qaynim esa “Neftchi” jamoasida to‘p suradigan futbolchi ekan. Qaynim kulib, meni aktyor ekanimni aytgan. Shundan keyin ayolim haqiqatni bilgan, deydi Talʼat Yo‘ldoshev.
“Uyimga non olib kirolmagan kunlarim bo‘lgan”
— Baʼzi odamlarning qiyinchiliklari haqida eshitib, kulib qo‘yaman. Agar qiyinchilik uchun inson ruhiy tushkunlikka tushishi kerak bo‘lsa, men allaqachon o‘zimni osmondan otib yuborishim kerak ekan. Yashirmayman, mening ro‘zg‘orimda ham har xil vaziyatlar bo‘lib turadi. Shunday paytlar ham bo‘lganki, odamlar qanchalik tanishmasin, uyimga ikkita non olib kirolmaydigan vaziyatlarga tushib qolganman. Ayolim aslida kimyogar, ammo bir necha yildan buyon onlayn do‘kon yuritadi. Bilasizmi, erkak kishi uchun eng qiyini, pulsiz qolganingizni bilib, ayolingiz “Mana buni ishlatib turing yoki bunga ro‘zg‘orlik qilib keling”, degani bo‘lsa kerak. Mana shunday vaziyatlar meni ruhan qiynaydi. Oilam-ku, qiyinchiliklarda yetarlicha toblangan, ammo ayolimni ham qiynayapman deb o‘zimni qiynayman.
“Yaratgan bizni farzandsizlik bilan sinayapti”
— Yaratgan meni bolalikdan to shu kungacha sinagan. Bundan hech qachon nolimayman va tushkunlikka ham tushib qolmayman. Buning ajrini berishiga ishonaman. Ko‘p davralarda “Farzandlardan nechta?”, deb so‘rashsa nima deyishimni bilmay qolaman. Bu ham bir sinov, qo‘limizdan nima ham kelardi?! Yaratgan bizni farzandsizlik bilan sinayapti. Bir necha kun avval ham ayolim “Boshqa ayolga uylanib farzand ko‘ring, umringizni xazon qilmang”, dedi. Bu gapni gapirish ayol kishiga qanchalik og‘irligini bilaman. Menga ham ko‘pchilik shunday maslahat bergan. Xo‘p, men oila qurib farzandli bo‘larman, ammo ayolimning ahvoli nima kechadi? Mening ko‘nglimga ikki ayol sig‘maydi. Baʼzan o‘ylab qolaman, bolaligimdan Samandar Hamroqulovga havas qilib, uni g‘oyibona ustozim deb bilardim. Shu inson ham 15 yil deganda farzandli bo‘ldi, demak sabr qilsak Yaratgan bizga ham beradi, deydi Talʼat Yo‘ldoshev.
Suhbatni to‘liq holda quyida tomosha qilishingiz mumkin.
Izoh (0)