“Nyukasl” va Braziliya terma jamoasi yarim himoyachisi Brunu Gimarayesh faoliyatini Saudiya Arabistoni Pro Ligasida davom ettirishi mumkin. Bu haqda ESPN nashri xabar berdi.
Manbaga ko‘ra, 26 yoshli futbolchiga jiddiy tarzda qiziqish bildirayotgan klub bu — “Al-Ittihod”. Saudiyaliklar Gimarayeshni yozgi transferlar oynasi vaqtida jamoaga olib kelishga hamda uning uchun 120 million yevro to‘lashga tayyor. Hozirda jiddaliklar futbolchining agentlari bilan muzokaraga kirishgan.
Shuningdek, uning atrofidagi vaziyatni Saudiya Arabistonining boshqa grandi — “Al-Hilol” ham kuzatib turibdi. Biroq Gimarayesh “Al-Hilol” uchun ikkinchi variant sifatida ko‘rilayotgani aytilmoqda. Agar riyodliklar “Manchester Yunayted” sardori Brunu Fernandeshni qo‘lga kirita olmasa, braziliyalik futbolchi uchun harakat qilib ko‘radi.
Gimarayesh joriy mavsumda “Nyukasl” va Braziliya termasi safida jami 53 o‘yinda maydonga tushdi, 5 ta gol va 9 ta golli uzatmaga mualliflik qildi. 26 yoshli yarim himoyachining “qarg‘alar” bilan shartnomasi 2028-yilning yozigacha amal qiladi. Transfermarkt portali braziliyalikning qiymatini 80 million yevroga baholamoqda.
Izoh (0)