“Real” klubining sobiq bosh murabbiyi Zinedin Zidan Saudiya Arabistonining “Al-Hilol” jamoasidan tushgan taklifni rad etdi. Bu haqda L’Equipe nashri xabar berdi.
Manbaga ko‘ra, saudiyaliklar fransiyalik mutaxassisga 100 million yevrodan ortiq miqdorda shartnoma taklif qilgan. Biroq Riyod klubi Zidanga qancha muddatgacha amal qiladigan kelishuv taklif qilgani ma’lum emas. Zinedin bu taklifga qiziqish bildirmagan va rad javobini bergan.
Uning asosiy maqsadi — Fransiya terma jamoasini boshqarish. Ma’lumotlarga ko‘ra, terma jamoaning ayni paytdagi bosh murabbiyi Didye Desham 2026-yilgi Jahon chempionatidan keyin lavozimini tark etadi. Shundan keyin Zidan “uch ranglilar” ustoziga aylanishi kutilmoqda.
Ma’lumot uchun, “Al-Hilol” 2-may kuni portugaliyalik mutaxassis Xorxe Jesusni ishdan bo‘shatdi. Shundan keyin Muhammad Al Shalhub vaqtinchalik bosh murabbiy etib tayinlandi.
Zidan bosh murabbiy sifatida faqat “Real Madrid” klubida faoliyat olib borgan. U dastlab 2016–2018-yillarda, so‘ng 2019–2021-yillar oralig‘ida “qaymoqranglilar”ni boshqargan
Avvalroq Zidan Adidаs kompaniyasi tomonidan tashkil etilgan yopiq tadbirda ishtirok etar ekan, Fransiya terma jamoasini boshqarish orzusi haqida gapirgan.
Izoh (0)