“Manchester Siti” bosh murabbiyi Pep Gvardiola yozgi transferlar oynasida jamoani kuchaytirishni maqsad qilgan. U klub rahbariyatidan “Barselona” yarim himoyachisi Fermin Lopes transferini so‘radi. Kataloniyaliklar a’zosi jamoadan ketgan Kevin De Bryuynega munosib o‘rinbosar sifatida ko‘rilmoqda. Bu haqda Fichajes nashri xabar berdi.
Manbaga ko‘ra, “shaharliklar” Lopes uchun “Barselona”ga 60 million yevro to‘lashga tayyor. Biroq “ko‘k-anorranglilar” futbolchi bo‘yicha aniq pozitsiyasini bildirmagan. Shu sababli uning kelajagi hozircha noaniq qolmoqda.
Ayni paytda “Barselona”da raqobat kuchli. Fermin esa muntazam o‘yin amaliyotiga ega bo‘lishni va 2026-yilgi Jahon chempionatiga yaxshi sport formasida borishni xohlamoqda. Bu holat uning jamoani tark etish ehtimolini oshirishi mumkinligi aytilmoqda.
Hozirda Lopesga nafaqat “Manchester Siti”, balki “Chelsi”, “Liverpul” va “Atletiko Madrid” klublari ham jiddiy qiziqish bildirmoqda. Shu bois “Barselona” futbolchini transfer qilish orqali maksimal foyda olishni maqsad qilgan.
Ma’lumot uchun, Fermin Lopes o‘tgan mavsum “Barselona” safida jami 46 o‘yinda maydonga tushib, 8 ta gol va 10 ta assistga mualliflik qilgan. Uning klub bilan amaldagi shartnomasi 2028-yilning yoziga qadar mo‘ljallangan. Transfermarkt portali futbolchining qiymatini 50 million yevroga baholamoqda.
Izoh (0)