Ijtimoiy tarmoqlarda Beshariq tumanida “yovvoyi” kimsa paydo bo‘lgani va ayollar, bolalarga tashlanib qolayotgani haqida xabarlar tarqaldi. Holat Farg‘ona viloyati IIB tomonidan o‘rganib chiqildi.
Mazkur holat yuzasidan o‘tkazilgan tezkor qidiruv hamda tergovga qadar tekshiruv harakatlari davomida fuqarolar tomonidan aytib kelinayotgan “yalang‘och odam”, “yovvoyi odam”ni hech bir shaxs ko‘rmagani, uning tasviri videokuzatuv kameralariga tushmagani, qolaversa mazkur holat sun’iy shov-shuv ko‘tarish uchun tarqatilgan yolg‘on xabar ekani ma’lum bo‘ldi.
“Hurmatli fuqarolar, yuqoridagi kabi xabarlarga ishonib, noo‘rin xulosaga bormang. Ijtimoiy tarmoq faollarini bu kabi asoslanmagan ma’lumotlarni tarqatmaslikka chaqiramiz”, deyiladi xabarda.
Bundan avval ijtimoiy tarmoqlarda Zomin milliy tabiat bog‘ida yo‘l bo‘yida ayiq yurgani haqida video tarqalgan edi. Zomin milliy tabiat bog‘i nazoratchilari tomonidan hududni tunda nazorat qilish chog‘ida yo‘l bo‘yida ayiq yurganining guvohi bo‘lgan va bu holat mobil tasvirga olingan. 14-may kuni Milliy bog‘ matbuot xizmati tomonidan bu tasvir o‘z rasmiy kanaliga joylangan va tarmoq foydalanuvchilari tomonidan bu holat noto‘g‘ri talqin etilib tarqatilgan.
Izoh (0)