“Manchester Yunayted” yarim himoyachisi Brunu Fernandesh Saudiya Arabistoni chempionatiga o‘tish variantini jiddiy ko‘rib chiqmoqda.
Jurnalist Ben Jeykobsning xabar berishicha, futbolchining agenti Migel Pinyu hafta boshida Riyodga borib, “Al-Hilol” vakillari, jumladan klub prezidenti Fahad bin Nafal bilan muzokaralar o‘tkazgan. Futbolchiga yaqin manbalar muzokara ijobiy yakunlangani va tomonlar transfer borasida kelishuvga erishganini bildirgan.
“Al-Hilol” Klublar o‘rtasidagi Jahon chempionati boshlanishidan oldin bir qancha katta transferlarni amalga oshirishni istamoqda. Shuning uchun ular Brunu Fernandeshdan payshanbagacha javob berishni so‘rashgan. So‘nggi 48 soat ichida futbolchining roziligini olish uchun faol harakatlar amalga oshirilgan.
Ayni paytda “Al-Hilol” tomondagilar Brunu Fernandesh bu taklifni rad etmaganini tasdiqlagan. Biroq “Manchester Yunayted” pozitsiyasi qat’iy — klub sardorini qo‘yib yuborishni istamayapti.
Ma’lumot uchun, Fernandesh joriy mavsum APL doirasidagi 36 uchrashuvda maydonga tushib, o‘z hisobiga 6 ta gol hamda 10 ta assist yozdirib qo‘ygan. Futbolchining mankunianliklar bilan shartnomasi 2027-yilning yoziga qadar amal qiladi. Transfermarkt portali Brununing qiymatini 55 million yevroga baholamoqda.
Izoh (0)