Portugaliya Millatlar Ligasi chempioniga aylandi. Bu g‘alabada yana bir bor asosiy qahramon — Krishtianu Ronaldu bo‘ldi. Yevropa uni yana tilga olmoqda: millionlab tvitlar, ko‘z yoshlarini aks ettirgan videolar, har bir yuz ifodasini kuzatgan kameralar — hamma e’tibor Ronalduga qaratilgan.
U hanuz e’tibor markazida va bu bejiz emas. Odamlar uni XXI asr futbolining timsoli deb atashmoqda — bu gapda jon bor. Chunki u oddiy futbolchi emas. U — boshqalardan butunlay farq qiladigan shaxs.
Messi boshqa yo‘ldan bordi. Unga tug‘ma iste’dod, nozik texnika, o‘yinni chuqur anglash va, albatta, “Barselona”dagi mukammal tizim yordam berdi. Kataloniyada deyarli har bir murabbiy Kroyf falsafasiga tayanardi.
Messi hech qachon maydonda o‘z o‘rnini talab qilmagan. U shunchaki chiqdi va o‘yin boshlanishi bilan iste’dodini namoyon etdi. U — tug‘ma daho.
Ronaldu esa har narsaga o‘zi erishgan. U har doim qarshiliklarga, sharoitga, taxminlarga va hattoki futboldagi an’anaviy qarashlarga qarshi kurashgan.
U mehnatga to‘la berilgan inson. Tinmay o‘z ustida ishlagan va mehnat orqali iste’dod yarata olgan.
Uning kuchli gavdasi — sport zalida o‘tgan o‘n yillik mashg‘ulotlar mahsuli.
Uning aniq zarbalari — minglab marta takrorlangan mashqlarning natijasi.
Uning ruhiy barqarorligi esa — ingliz stadionlaridagi bosim, keskin tanqidlar va terma jamoadagi og‘ir mag‘lubiyatlar orqali shakllangan.
U qo‘lga kiritgan sovrinlarga nazar soling:
- 5 karra “Oltin to‘p” sohibi.
- 5 marta Chempionlar ligasi g‘olibi.
- 2016-yilda Portugaliya bilan Yevropa chempioni (bu jamoa ilgari faqat 2000-yilda yarim finalgacha yetib borgan edi).
- 2 karra Millatlar Ligasi chempioni.
- Terma jamoalar tarixidagi eng yaxshi to‘purar.
- Chempionlar Ligasi tarixidagi eng sermahsul futbolchi.
- Futbol tarixidagi eng ko‘p gol urgan o‘yinchi — 890+ gol.
Bu ro‘yxatni davom ettirish mumkin. Ammo eng muhim jihati shundaki — u bu yutuqlarning aksariyatini Portugaliya bilan qo‘lga kiritgan. Braziliya yoki Argentina kabi jamoalarda emas, balki oddiy, mehnatkash Portugaliya bilan.
Nega u futbol ramziga aylangan?
Chunki futbol timsoli bo‘lish — faqat mashhur bo‘lish emas. Bu — har doim e’tibor markazida bo‘lish, kim uchundir ilhom manbai, boshqalar uchun esa bahs mavzusi yoki tanqid nishoni bo‘lish demakdir.
Futbol ramzi degani bu — sen jim turganingda ham seni muhokama qilishlari.
Ehtimol, Messi futbolning o‘zidir.
Ammo Ronaldu — butun bir davr. Va bu davr hali tugagani yo‘q.
2026-yilgi Jahon chempionati saralash bahslarini tomosha qiling.
U yana maydonga tushadi. 40 yoshida ham.
Shunchaki majbur bo‘lgani uchun emas — hanuz bunga qodir bo‘lgani uchun.
Jamshidbek Mahmudov tayyorladi.
Izoh (0)