Portugaliya terma jamoasi va “An-Nassr” klubi hujumchisi ajoyib Krishtianu Ronaldu sermahsullik namoyish etmoqda. Opta nashri ma’lumotlariga ko‘ra, futbolchi 30 yoshdan keyin Portugaliya terma jamoasi safida 84 ta gol urgan.
Ko‘pchilik futbolchilar 30 yoshdan so‘ng natijadorligini yo‘qotadi, ammo Ronaldu bunday futbolchilar qatoriga kirmaydi. U aksincha, bu yoshdan keyin ham yuqori tempda o‘ynashda davom etib, faoliyatidagi eng sermahsul yillarini o‘tkazmoqda.
Hujumchi 30 yoshga to‘lgach, 84 ta gol urgan va bu ko‘plab futbol afsonalarining butun faoliyati davomida terma jamoa safida qayd etgan natijasidan ham ko‘proq.
Misol uchun, braziliyalik futbolchi Neymar butun faoliyati davomida terma jamoada 79 ta gol urgan, afsonaviy hujumchi Peleda esa bu ko‘rsatkich 77 tani tashkil qiladi. Jahon chempionatlari to‘purari Miroslav Kloze esa Germaniya terma jamoasi safidagi butun faoliyati davomida 71 marta raqib darvozasini ishg‘ol qilgan.
Ma’lumot uchun, 23-mart kuni Portugaliya terma jamoasi Daniyaga qarshi bahs olib bordi. Unda maydon egalari 5:2 hisobida g‘alaba qozonib (umumiy hisob — 5:3), Millatlar Ligasi yarim finali yo‘llanmasiga ega chiqdi. Portugaliyalik hujumchi Krishtianu Ronaldu jamoasining o‘yindagi 2-golini kiritib, g‘alaba uchun o‘z hissasini qo‘shdi.
Izoh (0)