UEFA Millatlar Ligasi chorak final javob bahslari doirasidagi Portugaliya — Daniya o‘rtasidagi bellashuv 23-mart, yakshanba kuni bo‘lib o‘tdi. Unda maydon egalari 5:2 hisobida g‘alaba qozonib (umumiy hisob — 5:4), yarim final yo‘llanmasiga ega chiqdi. Portugaliyalik hujumchi Krishtianu Ronaldu jamoasining o‘yindagi 2-golini kiritib, g‘alaba uchun o‘z hissasini qo‘shdi.
Shu tariqa, 40 yoshli futbolchi faoliyatidagi 929, terma jamoadagi 136-golini kiritdi. Shuningdek, Ronaldu milliy jamoa safida ketma-ket 22 yil davomida gol urgan tarixdagi ilk futbolchiga aylandi.
Krishtianu 6-daqiqada penaltidan foydalana olmadi. Uning Kasper Shmeyxel darvozasiga tepgan 11 metrlik jarima to‘pi faoliyatidagi 205-penalti sifatida qayd etildi. Futbolchi ushbu jarima zarbalarining 173 martasini aniq amalga oshirgan bo‘lsa, 32 marta nuqtadan adashgan.
Avvalroq futbolchi faoliyatini yakunlashga qadar 1000 ta gol urmoqchi ekanligi haqida gapirgan edi:
Men 1000 ta gol urishni maqsad qilganman, lekin boshqalardan farq shundaki, men kiritgan barcha gollar videoyozuvlar bilan tasdiqlangan.
Hujumchi ushbu tarixiy natijani qayd etish uchun yana 71 ta gol urishi talab etiladi.
Ma’lumot uchun, Portugaliya yarim final uchrashuvini Germaniyaga qarshi o‘tkazadi. Ushbu bellashuv 4-iyun kuni bo‘lib o‘tadi.
Izoh (0)