Faoliyati mobaynida Lionel Messi bilan ham, Krishtianu Ronaldu bilan ham o‘ynagan futbolchilar juda kam, ammo Leoning “PSJ”ga o‘tishi bilan ushbu ro‘yxat yana beshta nomga ko‘payishi mumkin. Bular: Keylor Navas, Ashraf Hakimi, Danilo Pereyra, Pablo Sarabiya va Serxio Ramos. Ushbu futbolchilarning yoki “Real”da yo Portugaliya terma jamoasida Krishtianu bilan yo‘llari kesishgan.
Quyida zamonamizning ikki eng yaxshi dahosi bilan birga to‘p surish baxtiga muyassar bo‘lgan barcha futbolchilar jamlandi.
Fernando Gago
Argentinalik himoyachi Krishtianu bilan 3 yil davomida “Real”da o‘ynagan bo‘lsa, Messi bilan Argentina terma jamoasi sharafini himoya qilgan.
Gabriyel Haynse
Haynse Roni bilan “Real”da birga o‘ynagan, biroq ungacha ularning yo‘li “Manchester Yunayted”da ham kesishgandi. Messi bilan esa u xuddi Gago singari Argentina terma jamoasida harakat qilgan.
Xerard Pike
Pike “Manchester Yunayted”da o‘z o‘rnini topolmagan bo‘lsa-da, Krishtianu bilan bir jamoada o‘ynash imkoniyatiga ega bo‘ladi. 2008—2021-yillarda esa u boshqa bir dahoning yonida to‘p surgan.
Andre Gomesh
Andre Gomeshning transferini “Barsa” rahbariyatining muvaffaqiyatsiz yurishi deb ko‘rsatish mumkin: 46 uchrashuvda atigi 3 ta gol. Gomesh “Barselona”da Messi bilan o‘ynagan bo‘lsa, Portugaliya termasida Krish bilan jamoadosh bo‘lgan.
Anxel di Mariya
Ikki daho bilan birga o‘ynagan eng yorqin yulduzlardan bo‘lgan di Mariya 2014-yilda Ronaldu bilan birgalikda (“Real”) Chempionlar Ligasida g‘olib chiqqan, 2021-yilda esa Messi boshchiligida Amerika Kubogini qo‘lga kiritdi. “O‘zga sayyoraliklar” bilan ikkita katta musobaqada g‘alaba qozonish — kamdan-kam uchraydigan holat.
Karlos Teves
Teves “Manchester Yunayted”da Ueyn Runi va Ronaldudan iborat dahshatli tandem bilan birga ishlagan bo‘lsa, Messi bilan ikki marta Amerika Kubogi finaliga qadar yetib borgan.
Paulo Dibala
Dibalaga uzoq vaqtdan beri Argentina terma jamoasida Messining vorisi sifatida qaraladi. Paulo, shuningdek, Krishtianu bilan birgalikda ikki marta A Seriyada chempioni bo‘lgan.
Gonsalo Iguain
Gonsalo Ronaldu bilan birgalikda birato‘la ikkita klubda o‘ynagan: “Real” va “Yuventus”. Messi bilan esa terma jamoada uzoq yillik munosabatlarga ega: ular birgalikda juda ko‘p finallarni boy bergan.
Henrik Larsson
Shvetsiyalik hujumchi bir mavsum davomida ikkita daho bilan o‘ynashga va sovrinlar qo‘lga kiritishga muvaffaq bo‘ladi: avval yosh Messi bilan 2006-yilgi Chempionlar Ligasini qo‘lga kiritadi. 2007-yilda esa “Manchester Yunayted” safida Krishtianu bilan Angliya Premyer Ligasida g‘olib chiqadi.
Nelson Semedu
Portugaliyalik o‘ng qanot himoyachisi Messi bilan ikki marta La Ligada, Ronaldu bilan esa Millatlar Ligasi—2019 da g‘olib bo‘lishga muvaffaq bo‘lgan.
Esekiel Garay
Garay “Real”da ikki mavsum o‘tkazgan, o‘shanda Krishtianu jamoada o‘ynardi. Argentina terma jamoasi yetakchilaridan biri maqomida esa Messi bilan birgalikda JCh—2014 finaliga chiqqan.
Deku
Portugaliyalik yarim himoyachining “Barselona”dagi davri Messining dastlabki yillariga to‘g‘ri keladi. Krishtianu bilan esa u Portugaliya terma jamoasi sharafini himoya qilgan.
Martin Kaseres
Urugvaylik himoyachi har ikki yulduz bilan klub darajasida o‘ynagan sanoqli futbolchilardan biri hisoblanadi. U “Barselona”da Messi bilan uch yil (2008—2011-yillar) o‘tkazgan, 2019-yilda esa “Yuventus”da Ronaldu bilan jamoadosh bo‘lgan.
Miralem Pyanich
Bosniyalik yarim himoyachi xuddi Paulo Dibala singari Ronaldu bilan ikki marta A Seriya chempioni bo‘lgan, keyin esa Messining “Barselona”siga yo‘l oladi. 2021-yilning yozida u yana “Yuve”ga qaytishi va Ronaldu bilan birlashishi mumkin.
Artur
Braziliyalik yarim himoyachi “Barsa” safida ikkita yaxshi mavsum o‘tkazadi, lekin 2020-yilning yozida yuqorida nomi keltirilgan Pyanichga almashtiriladi va Turinga yo‘l oladi. “Yuve”da u hozircha juda kam o‘ynamoqda.
Fransishku Trinkau
Yosh portugaliyalik hujumchi 2020-yilda “Braga”dan “Barsa”ga ko‘chib o‘tadi va Messi bilan bir jamoada o‘ynashga muvaffaq bo‘ladi. Xuddi shu yilning o‘zida Fransishku Portugaliya terma jamoasida debyut qiladi va Ronaldu bilan yelkama-yelka to‘p suradi.
Izoh (0)