Qatar mezbonligida o‘tadigan futbol bo‘yicha Jahon Chempionatida ishtirok etadigan jamoalarning deyarli barchasi aniq bo‘lib ulgurdi (hozirda faqatgina 3 ta mundial chiptasi qolgan). Bu, shuningdek, har to‘rt yillikning eng nufuzli musobaqasini o‘tkazib yuboradiganlar ham ma’lum deganidir. Yanvar oyida ham Qatarga bormaydigan yulduzlar haqida so‘z yuritilgan va bahorga borib ularning soni yana kengayishi aytilgandi. Shunday ekan, hozir bu mavzuni davom ettirishning ayni fursatidir. “Daryo” Qatar—2022 ni uyida tomosha qiladigan taniqli futbolchilar to‘g‘risida hikoya qiladi.
Xoqon Chalxono‘g‘lu, Turkiya
So‘nggi mavsumlarda “Milan” va “Inter” safidagi nafis o‘yinlari bilan ko‘pchilikda iliq taassurotlar uyg‘otayotgan turkiyalik futbolchi butun saralash sikli davomida yorqin harakatlar ko‘rsatdi. “Inter” yarim himoyachisi aksariyat hollarda jamoasining joniga ora kirdi. Yevropa mintaqasi saralashi guruh bosqichida jamoa Niderlandiyadan keyin 2-o‘rinni egalladi va pley-off bosqichiga yo‘l oldi. Pley-off yarim finalida turklarni Krishtianu Ronaldu boshliq Portugaliya kutib turgandi. Kutilganidek, o‘yin Portugaliyaning ishonchli g‘alabasi (3:1) bilan yakunlandi. Xoqon esa bahsda jamoasiga yordam berishning uddasidan chiqa olmadi. Buning sababi uning yaxshi sport formasida emasligi bilan izohlandi. Chalxono‘g‘lu 2026-yilgi JChga borib, 32 yoshda bo‘ladi, futbolchilarning “umri” uzayayotgani hisobga olinib aytilsa, unda hali mundialda to‘p surish imkoniyati mavjud.
Zlatan Ibrahimovich, Shvetsiya
Qarishni bilmaydigan taniqli hujumchilardan bo‘lgan Ibrahimovich ham Qatardagi Jahon Chempionatini tomoshabin sifatida kuzatadi. Ma’lum muddatlik tanaffusdan keyin terma jamoadan chaqiruv olgan 41 yoshli Zlatan saralash bosqichida jarohati sabab barcha uchrashuvlarda ishtirok etolmadi, o‘z hisobiga gol ham yozdirib qo‘ymadi. Shunga qaramay u jamoasining asosiy o‘yinchilaridan biri hisoblanadi. Bunday futbolchining borligi, avvalo, jamoaning qolgan a’zolariga o‘zgacha ishonch bag‘ishlaydi.
To‘g‘ridan to‘g‘ri mundial yo‘llanmasiga ega chiqa olmagan Shvetsiya pley-offning so‘nggi bosqichidagi ilk (yarim final) o‘yinida Polsha bilan to‘qnash keldi. Bu, shuningdek, Robert Levandovski va Ibrahimovich o‘rtasidagi qarama-qarshilik ham edi. Jahon futbolining ikki super yulduzidan biri hech narsasiz qolishi oldindan aniq bo‘lgan. Yakunda esa uloqni Leva boshchiligidagi Polsha olib ketdi.
Alohida qayd etish kerak, bu Ibrahimovichning faoliyatidagi so‘nggi mundial bo‘lishi mumkin edi. Ammo oxirgi marta 2006-yilda JChda to‘p tepgan hujumchi terma jamoadagi faoliyatini yakunlamoqchi emas. Zlatan Polshaga mag‘lub bo‘lganidan keyin shunday dedi:
“Hafsalamiz pir bo‘ldi, tushkunlikka tushdik. Ammo mag‘lubiyatga uchraganingizda bunday bo‘lishi tabiiy. Hamma Jahon Chempionatida qatnashishni, o‘ziga xos hislarni boshdan kechirishni istaydi. Afsuski, hozir bizda bunday imkon yo‘q. Terma jamoada o‘ynashda davom etaman deb umid qilaman. Sog‘ bo‘lsam, jamoaga yordam bera olsam, terma jamoada o‘ynashni xohlayman”.
2026-yilga borib, Ibrahimovich 45 yoshni qoralab qo‘ygan bo‘ladi...
Jorjinyo va Marko Veratti, Italiya
2021-yilning yozida o‘tgan Yevro—2020 da ko‘rsatilgan dominant o‘yin va g‘oliblikdan so‘ng aksariyat muxlislar qatori ekspertlar ham Apenin yarim oroli vakillaridan mundialda ham qit’a chempionatidagidan kam bo‘lmagan natija kutishini yashirib o‘tirmagandi. Ammo kutilmaganda, barchasi sensatsion darajada o‘zgarib ketdi. Roberto Manchini shogirdlari guruh bosqichida Shveysariyani o‘tkazib yuborgani kamdek, pley-offda Shimoliy Makedoniyaga yutqazib qo‘ydi. Jamoa bu to‘siqdan o‘tganida, g‘alabaga tashna Portugaliya timsolidagi oson bo‘lmagan navbatdagi sinovga duch kelardi. Italiya terma jamoasi esa o‘zining ham, muxlislarining asabi bilan ortiqcha o‘ynashmay Shimoliy Makedoniya to‘sig‘ida to‘xtab qo‘ya qoldi.
Italiyaning mag‘lubiyati ruhiyatning futboldagi o‘rni nechog‘lik ekanini yana bir bor ko‘rsatib berdi. Hech bir kemtigi bo‘lmagan italyanlar (o‘ta) kuchli bosim ostida xuddi o‘zlari o‘ziga yutqazib qo‘ygandek.
Jamoa tarkibi haqida gap ketganda ham barchasini ideal darajada deyish mumkin. Mintaqaning eng zo‘r darvozaboni, bir necha ming yillardan beri futbol o‘ynayotgandek taassurot qoldiradigan “dinozavr” (tajribali, burungi, eski ma’nolarida) himoyachilar. Oldingi chiziq vakillari haqida esa umuman gapirmagan ma’qul. Shu fonda ikki futbolchi yaqqol ajralib turadi. Bular Jorjinyo va Marko Veratti. Jorjinyoning o‘tgan Yevrodagi xizmatlari beqiyosdir, shuningdek, “Chelsi” bilan Chempionlar Ligasidagi qahramonlik ham uni allaqachon jahon darajasiga olib chiqib bo‘lgan. Veratti esa terma jamoadagi “qora” ishlardan tashqari, qovushmagan “PSJ”da Kilian Mbappega jo‘ra bo‘layotgan kam sonlilardan. Shunday ekan, Italiya termasi, xususan, bu ikki oltin boshning Qatarga bormasligi futbol muxlisi sifatida kishi ko‘nglini xira qiladi.
David Alaba, Avstriya
Klub miqyosida havas qilishga arziydigan darajada natijalarga erishgan Alabaning oyog‘idan har doim terma jamoasi chalib keladi. Avstriya termasida unga hamrohlik qiladigan darajadagi o‘yinchilarni topish ancha mushkul. Biroq bu safar Alaba mundialga har qachongidan ham ko‘proq yaqinlashgandi. Saralash guruhidagi muvaffaqiyatsiz natijalarga qaramay jamoa Millatlar Ligasi doirasidagi natija tufayli o‘tish o‘yinlariga yo‘llanmani qo‘lga kiritgandi.
Biroq Avstriya Uels to‘sig‘idan o‘ta olmadi, yanada aniqroq aytilsa, bunga Garet Beylning dubli yo‘l qo‘ymadi. “Real”da zaxira o‘rindig‘idan turishni istamaydigan Beylning termada umuman boshqa odamga aylanishini ham ko‘pchilik qabul qilib ulgurgan.
Jahon futbolida yaxshigina nom qozongan Alaba faoliyatida hali biror marta ham Jahon Chempionatida qatnashmagan. Shu ketishda davom etsa, 29 yoshli himoyachiga bu nasib etmaslik ehtimoli ham ancha yuqori.
Aleksis Sanches va Arturo Vidal, Chili
Chili terma jamoasi favorit bo‘lmasa-da, o‘zi qatnashgan musobaqalarning deyarli barchasida o‘rtamiyonadan yuqoriroqda joylashib kelgan. Jamoaning o‘yini bilan kishini o‘ziga rom etib qo‘yadi, bahslar oldidan taxmin qilish ham qariyb imkonsiz ishdek. Lotin Amerikasi mintaqasini o‘ziniki qilib olgan Braziliya va Argentinadan keyin Urugvay bilan bir qatorda aynan Chili turadi.
Jamoa saralash musobaqasining guruh bosqichida 7-o‘ringa qadar tushib ketdi. Chili guruh bosqichidagi oxirgi uch o‘yinning barchasida mag‘lubiyatga uchradi: Ekvador (0:2), Braziliya (0:4) va Urugvay (0:2).
Terma jamoaning asosiy yulduzlari qatorida esa Aleksis Sanches va Arturo Vidalni ko‘rsatish mumkin, bu ikki futbolchi so‘nggi o‘n yil davomida nafaqat terma jamoada, balki Yevropada ham o‘z o‘rniga ega bo‘lib kelgan. Har narsa ham kun kelib so‘ngani kabi bu ikki futbolchi ham jamoasini mundial sari yetaklay olmadi, yosh avlodning esa o‘zlaridan oldingilar darajasiga chiqishiga hali ancha borligi isbotlandi. Shu tariqa Chili ketma-ket 2-mundialni o‘tkazib yuboradigan bo‘ldi.
Vidal mamlakati termasining muvaffaqiyatsizligini quyidagicha izohladi:
“Bizning avlod ko‘p cho‘qqilarni zabt etdi, faxrlanadigan narsamiz bor. Yangi o‘yinchilar paydo bo‘lishiga va ular bilan yanada kuchli bo‘lishimizga ishonchim komil”.
Vidal hozirda 34, Sanches esa 33 yoshda. Shunday ekan, ularni kelasi JChda kutmasa ham bo‘laveradi deyish adolatsizlik bo‘lmaydi.
Muhammad Saloh, Misr
So‘nggi mavsumlar davomida nomi Messi va Ronaldudan kam tilga olinmagan futbolchilardan biri Muhammad Saloh ham Qatardagi mundialni tomoshabin sifatida kuzatadi. “Liverpul” yulduzi boshchiligidagi “fir’avnlar” ikki oy ichida Senegalga ikki marotaba penaltilar seriyasida imkoniyatni boy berib qo‘ydi. Alam hissini ikki hissa oshiradigan jihat, har ikkala bahs bahosini ham hech nima bilan o‘lchab bo‘lmasdi. Birinchisida, Afrika Millatlar Kubogi bosh sovrini turgan bo‘lsa, ikkinchisida, mundial chiptasi.
Pley-off bosqichi ikki o‘yindan iborat edi. Qohiradagi bahsda Misr minimal hisobdagi g‘alabani tantana qiladi. Javob bellashuvida xuddi shu ssenariy takrorlandi, faqat bu safar Senegal foydasiga. Shundan so‘ng jamoalar penaltilar seriyasiga murojaat qiladi. O‘tgan o‘yinda navbat yetib kelmagan Saloh omad lotereyasini boshlab beradi. Urinish muvaffaqiyatsiz amalga oshirildi. Bunda butun o‘yin va penalti tepilayotgan vaqtda ham futbolchilarning yuziga lazer nurlarini tushirgan muxlislarning ham “hissa”si katta, albatta. O‘yindan keyin ushbu masalalarda Misr terma jamoasi tegishli tashkilotlarga shikoyat ham qildi. Ammo bu narsa hech narsani o‘zgartirmasligini ularning o‘zi ham yaxshi biladi.
Bundan oldingi mundial yo‘llanmasini vataniga sovg‘a qilgan Saloh bu safar qaysidir ma’noda antiqahramon rolida. Alamli juda.
Hatto uning o‘yindan keyingi kiyim almashtirish xonasidagi nutqini xayrlashuvga yo‘yganlar ham topildi. “Kelajakda bu yerda bo‘lish yo bo‘lmasligimdan qat’i nazar sizlar bilan birga o‘ynaganimdan faxrlanaman. Bu men uchun sharaf edi”.
Ro‘yxat kengayadi, yana
Yuqorida qayd etilganidek, hali barcha ishtirokchilar nomi aniq bo‘lib ulgurgani yo‘q. Notinch vaziyat tufayli Ukraina pley-off yarim finalidagi o‘yinini o‘tkaza olgani yo‘q. Shotlandiya qarshi bahs iyun oyiga qoldirilgan. Ushbu bahs g‘olibi finalda Uels bilan to‘qnash keladi. Shunday ekan, biroz tushkunroq kayfiyatda bo‘lgan ro‘yxatdan Garet Beyl, Aaron Remzi (ikkisi ham Uels), Endryu Robertson, Skot Maktominey (ikkisi ham Shotlandiya), Ruslan Malinovskiy, Oleksandr Zinchenko (ikkisi ham Ukraina) o‘rin olishi mumkin.
Izoh (0)