Argentinalik futbolchi Lionel Messi katta futbolda 2003-yilda debyut qilgan, portugaliyalik yulduz Krishtianu Ronaldu esa 2002-yilda. Ikkalasining raqobati uzoq yillar davom etdi. Shu vaqt ichida bir necha futbolchilar Ronaldu bilan ham, Messi bilan birga o‘ynashga muvaffaq bo‘ldi. Ularni yodga olamiz.
To‘qqiz nafar argentinalik futbolchi: Ular Ronaldu bilan “Manchester Yunayted” va “Yuventus”da sherik bo‘lgandi
Gabriel Haynse
Haynse “Manchester Yunayted”da uch mavsum o‘ynab, Ronaldu bilan birga APLni zabt etgandi. Ularning yo‘li “Real”da ham kesishishi mumkin edi, biroq portugaliyalikning madridliklar safiga o‘tishidan biroz muddat oldin Gabriel klubni tark etgandi. Haynse Messi bilan birga Argentina terma jamoasida o‘ynagan va ikkita Jahon Chempionatini o‘tkazgandi.
“Krishtianu futbolchi sifatida yanada yaxshilanadi deb o‘ylamayman, chunki u hozirning o‘zida eng yaxshilaridan”, — degandi argentinalik 2000-yillarning oxirida. Leo haqida esa: “Futbol nuqtai nazaridan olib qarasak, Messi bu sayyoradan emas”, — degan edi.
Fernando Gago
Gago Ronalduning “Real”dagi dastlabki ikki mavsumida birga o‘ynagan, Messi bilan birga uch marta kumush medalni qo‘lga kiritgan — Amerika Kubogi musobaqalari va JCH—2014 da.
Gago favorit borasida aniq tanlov qilgan: “Ronaldu men uchun birinchi raqamli emas. Dunyodagi eng yaxshisi — Messi. U takrorlab bo‘lmas qobiliyatga ega. Shubhasiz, men ko‘rganlar ichida u eng zo‘ri”.
Karlos Teves
Teves Ronaldu bilan birga “Manchester Yunayted”da 6 ta sovringa ega chiqqan, jumladan, APL va Chempionlar Ligasi sovrinlari. Messi bilan birga esa ikkita mundialni o‘tkazgan va Amerika Kubogi finallarida mag‘lubiyatga uchragan.
Karlos ikkala futbolchini ham hurmat qilishini, biroq doim Leo tomonda bo‘lishini ta’kidlagan.
Anxel di Mariya
Anxel “Real”da bir necha mavsum o‘ynagan va Ronalduning gollariga assistentlik qilgan. Messi bilan 4 ta Jahon Chempionatida ishtirok etgan va g‘oliblikni qo‘lga kiritgan so‘nggi mundialda ikkalasi ham gol urgandi.
Runi, Ibrahimovich, Messi va Ronaldu bilan birga o‘ynash orzu bo‘lganini aytib o‘tgandi di Mariya. “Agar birini tanlash kerak bo‘lsa, bu albatta, Messi bo‘ladi”, — deydi argentinalik futbolchi.
Gonsalo Iguain
Gonsalo Ronaldu bilan “Real”da ham, “Yuventus”da ham birga to‘p surgan. Portugaliyalik bilan kompaniya sifatida Iguain bir nechta sovrinlarni qo‘lga kiritgan. Argentina terma jamoasida esa Messi bilan jamoadosh bo‘lib, doimiy bosimlar ostida harakat qilgan.
Esekiel Garay
Xuddi Gago singari Garay ham Ronaldu bilan “Real”da o‘ynagan. Lekin Esekiel Madrid klubi safida asosiy tarkibdan joy ololmadi. Messi bilan esa ikki marta oltin medalga yaqin keldi — JCH va Amerika Kubogida.
Tanlov borasida esa unda hech qanaqa shubha yo‘q: “Tarixdagi eng yaxshi futbolchi haqida so‘rashganda, men Leo deb javob beraman. Uni ilk bor Argentina U-15 terma jamoasida ko‘rganman, shundan buyon u hamon meni hayratga solib kelmoqda”.
Paulo Dibala
Dibalaning Krishtianu bilan yo‘li “Yuventus”da kesishgan, turinliklar safida ular do‘stga aylandi, juda ko‘p muloqot qildi, urilgan gollarni bir-birining uslubida nishonladi. Leo bilan birga esa JCH—2022da g‘alaba qozondi. Paulo Ronaldu bilan muloqoti haqida gapirarkan: “Yoshligimda uni ko‘rishga ko‘zim bo‘lmaganini aytdim. Biz kulishdik. U bilan munosabatlar juda yaxshi”, — deydi.
Tanlov borasida esa Dibala: “Ikkalasidan birini tanlash yoki ikkalasini solishtirish imkonsiz”, — degan javobni bergan.
Alexandro Garnacho
Ro‘yxatdagi eng yosh futbolchi. Alexandro 2022-yilda Krishtianu bilan mankunianliklar safida birga to‘p surishga muvaffaq bo‘ldi. Argentina terma jamoasida esa 2023-yil yozida debyutini nishonladi.
19 yoshli futbolchi 2022-yil bahorida Ronalduni barcha davrlarning eng yaxshi futbolchisi deb atagan.
Lisandro Martines
Argentinalik futbolchi 2022-yil yozida “qizil iblislar” safiga o‘tdi va Ronaldu bilan bir jamoada o‘ynadi.
Martines JCH—2022 vaqtida Leoning o‘yinlaridan hayratga tushganini bildirgan: “Messi maydonda bo‘lganda, jamoadoshi sifatida sen ham yaxshiroq o‘ynashga intilasan. U eng zo‘ri. U bilan bir jamoada o‘ynayotganidan faxrlanaman”.
Portugaliyaliklar sakkiz nafar: Ularning barchasi ham Messi bilan birga “Barselona”da o‘ynamagan
Deku
Deku 2000-yillarning boshida yosh Messiga “Barselona”ga moslashishiga yordam bergan. Ronaldu bilan birga to‘rtta katta turnirda ishtirok etgan. Deku ikkalasi haqida ham fikr bildirishda ayyorona usuldan foydalangan: “Meni Ronaldinyo ko‘proq hayratga solgan, u men uchun doim eng yaxshisi bo‘lib qoladi”.
Andre Gomesh
Gomesh kataloniyaliklar safiga o‘tganidan so‘ng, juda katta bosim ostida qoldi. Bu haqida uning o‘zi: “Uyimdan chiqishni xohlamay qolgandim, muhokamalardan charchagandim. Bunday holat bir necha bor yuz bergandi”, — deydi. Portugaliya terma jamoasi bilan ham ishlari o‘xshagan deb ayta olmaymiz, biroq Ronaldu bilan birga Yevro—2016 da zafar quchgan.
Gomesh ikkala yulduzni ham birdek hurmat qilishini aytib o‘tgan.
Nelson Semedu
Gomesh kabi Semedi ham ikkala futbolchi bilan sovrin qo‘lga kiritishga muvaffaq bo‘lgan. Messi bilan birga La Liga chempionligiga erishgan bo‘lsa, Ronaldu bilan birga Millatlar Ligasi sovriniga ega chiqqan.
Nelson ular haqida gapirarkan, Ronalduning Ispaniya chempionatini tark etishi, “Barselona” uchun unchalik yomon xabar bo‘lmagani, Leo esa boshqa sayyoradan ekanligini ta’kidlagan. Bu yerda durang natija desa ham bo‘ladi.
Danilu
Danilu Ronaldu bilan Yevroda ham Millatlar Ligasida ham g‘alaba qozongan. Messi bilan esa “PSJ”da birga o‘ynagan. Futbolchi hech shubhasi portugaliyalikni tanlaydi: “Ronaldu — eng yaxshisi. U qanday o‘ynaydi, qanday ishlarni amalga oshiradi, menimcha, hech kim undan o‘tib keta olmaydi”.
Fransishku Trinkau
Portugaliyalik Leoning “Barselona”dagi so‘nggi mavsumida u bilan birga o‘ynashga muvaffaq bo‘lgan. Ronaldu bilan birga esa Portugaliya terma jamoasida bir nechta o‘yin o‘tkazgan. Trinkau ikkala yulduz haqida diplomatik javob beradi: “Ronaldu bilan ham, Messi bilan ham o‘ynaganimdan faxrlanaman. Ikkalasidan qaysi biri yaxshiroq ekanligini aytish ilojsiz”.
Nunu Mendesh
Mendesh Messini ham, Ronalduni ham o‘z kumiri deb hisoblamaydi. “Leo va Krish bilan bir jamoada o‘ynash — ko‘pchilik uchun orzu. Lekin mening sevimli futbolchim o‘z pozitsiyamga yaqin bo‘lgan Jordi Alba.
Vitinya
Portugaliyalik yarim himoyachi “PSJ” o‘tishi bilan o‘sha mashhur savoldan qutulib qololmadi. “Mening javobim aniq, ularni taqqoslashni iloji yo‘q. Ular bilan birga o‘ynash esa — ulkan faxr”, — degandi Vitinya.
Renatu Sanshesh
Yevro—2016 qahramoni 2022-yilda “PSJ”ga o‘tgandi. Parijda esa uning ishlari yurishmadi, butun mavsum davomida atigi 905 daqiqa maydonga tushdi va Messining ortidan u ham klubni tark etishi kutilmoqda.
Yana to‘qqiz nafar futbolchi Messi va Ronaldu bilan klublar miqyosida birga o‘ynagan
Xerard Pike
Ronaldu bilan “Manchester Yunayted”da qisqa muddat birga o‘ynagan ispaniyalik himoyachi “Barselona” safida Messi bilan birgalikda aynan Krishtianu to‘p suradigan “Real”ga qarshi juda ko‘p maydonga tushgan. Pike ularning ikkisi haqida shunday deydi: “Messi odam emas, Ronaldu esa odamlar ichida eng yaxshisi”.
Henrik Larsson
Messisi bor “Barselona”ga o‘tgan — chempionga aylangan. Ronaldusi “Manchester Yunayted”ga o‘tgan — chempionga aylangan. Messi bilan ikki mavsum birga o‘ynagan. Ronaldu bilan esa bir necha oy bir jamoada to‘p surgan.
Larsson argentinalik futbolchini ko‘proq yaxshi ko‘rishini aytib o‘tgan: “Ronaldu — juda zo‘r futbolchi, lekin Messi undan yaxshiroq”.
Martin Kaseres
Urugvaylik futbolchi “ko‘k-anorranglilar” safida Leo bilan birga o‘ynagan. Shundan so‘ng Kaseres Italiya chempionatida faoliyat olib borgan va “Yuventus”da Ronaldu bilan birga o‘ynagan.
Martin hech qachon Messi va Ronalduni taqqoslamagan.
Artur
Bu yerda ham “Yuventus” va “Barselona”. Artur Messi bilan bigra Ispaniya chempionligi va mamlakat Superkubogini qo‘lga kiritgan. Krishtianu bilan esa Italiya Kubogi va Superkubogida zafar quchgan.
“Ronaldu kiyim almashtirish xonasida juda faol. U hamma bilan suhbatlashadi va yaxshi munosabatda bo‘ladi. Har bir insonda yetakchilik qobiliyatini namoyon etadigan jihatlari bo‘ladi. Messi esa buni o‘z harakatlari bilan amalga oshiradi”, — deydi Artur.
Mirolim Pyanich
Bosniyalik yarim himoyachi “Yuventus” safida 4 mavsum o‘ynab, ularning barchasida skudettoni qo‘lga kiritgan.
“Barselona”da esa bitta og‘ir mavsumni o‘tkazgan. Ronaldu bilan ham, Messi bilan ham birga o‘ynagan Pyanich ikkalasini ham maqtaydi: “Ronaldu — barcha narsalarga ahamiyat beradigan haqiqiy sportchi. Messi esa o‘zga sayyoralik, mutlaq fenomen”.
Keylor Navas
Ro‘yxatdagi yagona darvozabon. Navas Ronaldu bilan birga uch marta Chempionlar Ligasida g‘alaba qozongan. Messi bilan esa “PSJ”da birga o‘ynadi.
Navas Leoni alohida e’tirof etadi: “U — ajoyib inson. Bir paytlar bir-birimizga qarshi o‘ynaganmiz, lekin bir jamoada o‘ynaganimizda esa uning kamtarligi, oddiy va mehnatkash insonligini ko‘rib hayratlanganman”.
Serxio Ramos
Eng kutilmagan burilish: Ramos va Messi “El-klasiko”larda doim bir-biriga qarshi o‘ynardi, ba’zan ziddiyatlarga borardi. Biroq, 2021-yilda ikkala futbolchining yo‘li “PSJ”da kesishadi. “Krishtianuning o‘yinini e’tirof etish uchun yangi so‘zlar o‘ylab topish kerak”, — degandi Ramos “Real”dagi jamoadoshi haqida.
“PSJ”ga o‘tgach esa: “Leo men uchun dunyoning eng yaxshi futbolchilaridan biri, agar eng yaxshisi bo‘lmasa”, — degan edi.
Ashraf Hakimi
Marokashlik futbolchi Ronalduning “Real”dagi so‘nggi mavsumida u bilan birga o‘ynagan va barcha musobaqalarda 17 ta o‘yin o‘tkazgan. Messi bilan esa “PSJ”da birga harakat qildi.
Agar eng kuchli kimligini so‘rash kerak bo‘lsa, yaxshisi Hakimidan so‘ramagan ma’qul: “Ular o‘rtasida hech qanday farq yo‘q. Sovrinlarga chanqoq bo‘lgan chempionlar. Ikkalasi bilan ham birga ishlab, juda ko‘p narsa o‘rganganman”.
Pablo Sarabiya
Sarabiya Ronaldu bilan birga rasmiy o‘yinlarga bir paytda maydonda bo‘lmagan. Faqatgina bitta o‘yinda aynan portugaliyalik futbolchining o‘rniga maydonga tushgan. Messi bilan esa Parijda birga o‘ynagan. Pablo “PSJ”dagi so‘nggi ikki mavsumda ko‘p maydonga tushmagan va oxirida ijaraga ketgan edi.
Ispaniyalik futbolchidan tanlov qilishni so‘raganda: “Men uchun Ronaldu — dunyoning eng yaxshi futbolchisi. Ha, Leo qoyilmaqom futbolchi, uning uslubi o‘zga sayyoraliklarnikiga o‘xshaydi”.
Izoh (0)