Portugaliya terma jamoasi hujumchisi Krishtianu Ronaldu Saudiya Arabistonining “An-Nassr” klubida faoliyatini davom ettirishini ma’lum qildi.
Futbolchi Millatlar Ligasi finalidagi Ispaniyaga qarshi bahsdan keyin o‘zining kelajagiga oydinlik kiritdi:
Mening kelajagim? Aslida hech narsa o‘zgarmaydi. “An-Nassr”da qolamanmi? Ha, deya Ronaldu so‘zlarini keltiradi jurnalist Fabritsio Romano.
Riyodliklar va Ronaldu o‘rtasidagi tuzilgan amaldagi shartnoma 30-iyun kuni yakunlanadi. Yaqin kunlarda futbolchi klub bilan yangi bitim imzolanishi kutilmoqda.
O‘tgan mavsumda Ronaldu “An-Nassr”ning barcha musobaqalar doirasidagi 41 ta o‘yinida maydonga tushib, o‘z hisobiga 35 ta gol va 4 ta golli uzatma yozdirib qo‘ygan. Transfermarkt portali hujumchining qiymatini 12 million yevroga baholamoqda.
Eslatib o‘tamiz, Ronaldu boshchiligidagi Portugaliya terma jamoasi Millatlar Ligasi finalida Ispaniyadan ustun keldi (2:2, penaltilar seriyasi — 5:3). Mazkur sovrin Ronaldu uchun terma jamoa bilan qo‘lga kiritilgan uchinchi yirik g‘alaba bo‘ldi. Bungacha u 2016-yilgi Yevropa chempionati hamda 2019-yilgi Millatlar Ligasida ham chempionlikni nishonlagan.
Izoh (0)