Ikki kun “yashagan” Yevropa Superligasi
2021-yilning 18-aprel kuni Yevropaning 12 grand klubi boshchiligida Superligaga asos solindi. Ushbu loyihaning yetakchilari sifatida “Barselona”, “Real” va “Yuventus” katta sahnaga chiqdi. Biroq Liga tashkil topganidan ikki kun o‘tib, barcha klublar FIFA, UEFA va muxlislarning juda kuchli bosimi ostida birin-ketin loyihadan chiqqanini e’lon qila boshladi. Yuqorida nomi qayd etilgan klublar esa hamon loyihadan voz kechgani yo‘q va kurashishda davom etmoqda.
Garchi Superliga asoschilari Yevrokuboklar saviyasini oshirishni, yuqori darajadagi klublar va futbolchilar bir-biri bilan raqobat qiladigan format yaratish haqida bong urgan bo‘lsa ham, buning tagida moliyaviy manfaatlar yotgani hech kimga sir emas. Ammo UEFA ularga maydonni osonlikcha bo‘shatib bermadi, tashkilot klublarga turli sanksiyalar, chetlatishlar bilan bosim o‘tkazdi va loyihani to‘xtatib qoldi.
Shundan so‘ng tomonlar o‘rtasida sudlashuvlar bo‘lib o‘tdi va unda klublar foydasiga qaror qabul qilindi. Ayni paytda UEFA Superliganing utopiya ekanligini aytayotgan bo‘lsa, Florentino Peres boshchiligidagi “Superligachilar” loyiha davom etishi haqida gapirmoqda va puxtaroq reja hozirlamoqda.
Oktabr oyida OAV Superliga yangilangan reglamentda qaytishi haqida bong urdi. The Athletic xabariga ko‘ra, avval e’lon qilingan va muvaffaqiyatsizlikka uchragan yopiq turnir emas, balki 140 ta jamoa ishtirok etadigan musobaqalar piramidasi tashkil etiladi. Turnir uchta bosqichda o‘tkaziladi: oliy divizionda 20 ta klub, ikkinchi divizionda 20 tadan jamoaga ega 2 ta guruh, 3-divizionda esa 4 ta guruh bo‘ladi. Asosiy e’tibor o‘z ligasida gegemon bo‘la turib, YChLda muvaffaqiyatsiz qatnashadigan mamlakatlar jamoalariga qaratiladi.“Aristokratlar”ning shohsupaga qaytishi
2016/17-yilgi mavsumdan keyin katta musobaqalarda g‘alaba qozonmay qo‘ygan “Chelsi” uzoq vaqt davomida inqiroz davrini boshdan o‘tkazdi. Bu inqiroz 2021-yilga kelib barham topdi deyish mumkin. Klub prezidenti Roman Abramovich 2020/21-yilgi mavsum boshida transferlar uchun aql bovar qilmas pul sarfladi va yuqori darajali futbolchilarni Londonga olib keldi. Yanvar oyiga kelib esa Frenk Lempardning o‘rinini Tomas Tuxel egalladi. Germaniyalik mutaxassis kelishi jamoaning o‘yini darhol o‘zgardi. “Ko‘klar” uning qo‘l ostida APLda 4-o‘rinni egallagan bo‘lsa, Chempionlar Ligasi bosh sovrinini o‘ziniki qildi.
Bu “Chelsi” uchun ushbu musobaqada 2012-yildan keyingi ilk g‘alaba bo‘ldi. Jamoa bu yo‘lda pley-off bosqichida “Atletiko M”, “Portu”, “Real” kabi jamoalarni dog‘da qoldirdi. Hal qiluvchi bahsda esa boshqa bir ingliz klubi “Manchester Siti” minimal hisobda taslim etildi.
Tuxel jamoasi ushbu mavsumda ham o‘ziga xos uslubda o‘yin ko‘rsatib kelmoqda va APLda ham, YChLda ham g‘oliblik uchun asosiy da’vogarlar qatorida tilga olinmoqda.Yevro—2020 va yengilmas Italiya
Koronavirus pandemiyasi tufayli bir yil kechikib o‘tkazilgan Yevro—2020 muxlislarga kutilganidan ham ko‘proq emotsiya bera oldi. Guruh bosqichidan tortib, to hal qiluvchi bahslargacha bo‘lgan barcha bellashuvlar millionlar o‘yini ishqibozlarining e’tiborini o‘ziga jalb qildi.
Fransiya, Ispaniya, Belgiya, Germaniya, Portugaliya kabi favoritlar qatorida tilga olingan jamoalar o‘z darajasidan pastroq harakat qilgan bo‘lsa, Daniya va Shveysariya musobaqa kashfiyoti bo‘lib tomoshabinlar mehrini qozondi.
Musobaqa g‘olibiga aylangan yengilmas Italiya esa guruh bosqichidan 100 foizlik natija ko‘rsatib, pley-offda Belgiya, Ispaniyaga qarshi ajoyib o‘yin ko‘rsatdi. “Uembli”da kechgan finalda penaltilar seriyasida Angliyani mag‘lub etdi. Shu tariqa Roberto Manchini boshchiligidagi italyanlar 5 yil kutilgan qit’a chempionati bosh sovrinini Apenin yarim oroliga olib ketdi va 2022-yilgi Jahon Chempionati oldidan o‘zlari uchun ko‘tarinki kayfiyat yaratdi. Ammo hozircha Italiyaning Qatar—2022 ga borishi katta so‘roq ostida turibdi. Buning uchun jamoa pley-off bosqichida ikkita o‘yinda g‘alaba qozonishi kerak.Butun dunyoni qo‘rqitgan Kristian Eriksen
Yevro—2020 guruh bosqichi doirasidagi Daniya va Finlyandiya terma jamoalari o‘rtasidagi bahsning birinchi bo‘limida Kristian Eriksen to‘satdan, hech qanday kontakt yo‘q joyda maydonga yiqildi. Ushbu vaziyatda uning yuragi to‘xtab qoldi.
Shundan so‘ng Eriksenni saqlab qolish uchun uchrashuv deyarli bir soatga to‘xtatildi. Bu vaqt davomida shifokorlar uni jonlantirishga harakat qildi. Eriksen faqat kasalxonaga olib ketilish oldidangina ko‘zini ochdi. Shifoxonada operatsiyani boshdan o‘tkazgan futbolchining yuragiga kardioverter-defibrillyator qo‘yildi.
Ushbu bir soat davomida butun futbol olami tom ma’nodagi dahshatni boshdan kechirdi va Eriksenning tirik qolishi uchun duoda bo‘ldi. Eriksen yiqilgan vaziyatda tezkorlik bilan shifokorlarni chaqirgan, bu dahshatning kameralarga muhrlanmasligi uchun jonli aylana tashkil qilgan va Kristianning rafiqasiga dalda bergan Simon Kyer esa tom ma’noda yil qahramoniga aylandi.
Messiga atalgan Kopa Amerika
Janubiy Amerika chempionatining Yevro—2020 bilan bir vaqtda o‘tgani qaysidir ma’noda uning soyasida qolib ketishiga sababchi bo‘ldi. Shunga qaramay musobaqani kuzatgan muxlislar Lotin Amerikasi futbolining haqiqiy jozibasiga guvoh bo‘la oldi.
2021-yilgi musobaqagacha Lionel Messi terma jamoadagi o‘yini sabab tinimsiz ravishda tanqid qilinib kelinardi va bu qit’a birinchiligi Leoni ushbu “tamg‘a”dan xalos etdi.
Messi boshchiligidagi Argentina terma jamoasi musobaqa g‘olibligi yo‘lida hech qaysi raqibini ayab o‘tirmadi. Jamoa yarim finalga qadar ortiqcha qiyinchiliklarsiz, tartibli o‘yin ko‘rsatib yetib keldi. 1/2 finalda penaltilar seriyasida Kolumbiyani mag‘lubiyatga uchratdi. Hal qiluvchi o‘yinda esa musobaqa mezboni Braziliya taslim etildi. Lionel Messi 4 ta gol bilan musobaqa to‘purari bo‘ldi.
Uning finaldagi g‘alabadan keyingi quvonchi haqida yaxshisi ortiqcha gapirmagan ma’qul. Uning o‘rniga ko‘z yoshlar gapirdi...
Besh yil kutilgan Tokio Olimpiadasi
Yuqorida ta’kidlanganidek, 2020-yilda o‘tishi kerak bo‘lgan yirik musobaqalardan yana biri besh yil kutilgan to‘rt yillikning eng nufuzli musobaqasi — Olimpiada bo‘ldi.
200 dan ortiq davlat delegatsiyalari qatnashgan Tokio—2020 Olimpiadasida umumiy hisobda 339 ta medallar jamlanmasi o‘z egalariga topshirildi.
Karantin talablari qat’iy amal qilingan musobaqa juda ko‘plab takrorlanmas lahzalari bilan yodda qoldi. Bunga besh yil davomida Olimpiya o‘yinlari litsenziyasi uchun kurashgan va mashg‘ulotlar olib borgan sportchilarning musobaqalarga kirishishiga atigi bir necha soat qolganida virus yuqtirib olib, izolyatsiyaga olinishi, shohsupaga ko‘tarilgan sovrindorlarning medallarni o‘z bo‘yniga o‘zi taqishi va boshqa bir qancha noodatiy holatlarni keltirish mumkin.
Medallar hisobi bo‘yicha umumiy reytingda AQSh (39 ta oltin, 41 ta kumush, 33 ta bronza) birinchi o‘rinni egallagan bo‘lsa, Xitoy (38 ta oltin, 32 ta kumush, 18 ta bronza) va mezbon Yaponiya (27 ta oltin, 14 ta kumush, 17 ta bronza) kuchli uchlikka yakun yasab berdi.Messining “Barselona”dan ketishi
2021-yilning 5-avgustida Messining “Barselona”dan ketgani haqidagi xabar nafaqat futbol olami, balki millionlar o‘yiniga qiziqmaydiganlarning diqqatini tortdi. Faoliyatini katalon klubida boshlagan daho shu vaqtga qadar boshqa jamoada o‘ynamagandi va allaqachon tom ma’noda klubning ramziga aylanib ulgurgandi. Messini “Barselona”siz va “Barselona”ni Messisiz tasavvur qilib bo‘lmas edi.
Garchi tomonlar kelishuvni uzaytirishni xohlagan bo‘lsa-da, La Liga reglamenti bilan bog‘liq iqtisodiy va tarkibiy to‘siqlar tufayli hujjatni rasmiylashtirishning iloji bo‘lmadi.
Messi 2020-yilda ham “Barselona” rahbariyatidan xafa bo‘lib, jamoadan ketmoqchi bo‘lgandi, biroq o‘zini “odam qilgan” klub bilan sudlashishni xohlamay, qolishga qaror qilgandi. Ammo 2021-yilda umuman boshqacha holat bo‘ldi.
Dunyoning eng yaxshi (agar eng yaxshisi bo‘lmasa) ikki futbolchisidan biri erkin agentga aylanganida uni o‘z safiga qo‘shib olishni istaganlar tabiiyki, ko‘p bo‘ldi, ammo faqat “PSJ”gina uning moliyaviy istaklarini qondira oldi. Shu tariqa Messi Fransiya poytaxtiga yo‘l oldi va parijliklar safida Leo, Neymar, Kilian Mbappedan iborat fantastik trio tashkil topdi. Garchi trio kutilgani kabi zo‘r o‘ynamayotgan bo‘lsa ham, baribir muxlis ham, mutaxassis ham ularning ishtirokidagi o‘yinni katta qiziqish bilan kuzatishi bor gap. Hozircha Messi Fransiya chempionatida 11 ta o‘yin o‘tkazib, atigi 1 ta gol urdi.
Messi “Barselona” uning uyi ekanligini va qachondir u yerga qaytishini aytib keladi. Ma’lumot uchun, uning “PSJ” bilan amaldagi shartnomasi 2023-yilda o‘z nihoyasiga yetadi. O‘sha yilga borib, Leo 36 yoshda bo‘ladi va moliyaviy qiyinchiliklarni boshdan o‘tkazayotgan “Barselona”ga erkin agent sifatida qaytish ehtimoli yo‘q emas.“Adashgan o‘g‘il” — Ronalduning “Manchester Yunayted”ga qaytishi
Messining “Barselona”dan ketganidan-da shov-shuvliroq qanday xabar bo‘lishi mumkin? Javob juda oddiy: Krishtianu Ronalduning “Manchester Yunayted”ga qaytishi.
Manchesterdagi yurishini 2003-yilda boshlagan portugaliyalik 2009-yilga kelib, katta sarguzashtlar izlab, u yerdan bosh olib ketgandi. Shundan so‘ng Krish 12 yil davomida Ispaniya va Italiyani zabt etdi, bir necha marta Chempionlar Ligasida g‘alaba qozondi, “Oltin to‘p”larni qalashtirib tashladi.
Avgust oyiga kelib esa uning “Yuventus”dan ketmoqchiligi, unga asosiy da’vogarlardan biri “Manchester Siti” ekanligi aytildi. Hatto jahon futbolining eng nomdor insayderlari ham Krishtianuning “shaharliklar” bilan kelishuvga erishgani haqida xabar bera boshladi.
Biroq so‘nggi pallada barchasi o‘zgarib ketdi va Ronalduning uyga qaytishi aniq bo‘ldi. Ma’lumotlarga ko‘ra, Krishning “Siti” safiga yo‘l olishiga Aleks Fergyuson yo‘l qo‘ymagan va Ronalduni ikkinchi marta jamoaga olib kelgan.
Ko‘pchilik Ronalduning “Manchester”ga qaytishi jamoa uchun faqat zarar bo‘lishini taxmin qilgandi. Hozircha bu taxminlar o‘zini oqlagani yoki aksincha ekanligi haqida biror nima aytish qiyin. Lekin Ronaldu kelganidan beri jamoada hech qaysi futbolchi undan ko‘p gol ura olmagani faktdir — 14 ta.UEFA Millatlar Ligasi
Ko‘pchilik uchun tushunarsiz bo‘lgan Millatlar Ligasi musobaqasi ham bu yil ancha-muncha voqealarga boy bo‘ldi. Xususan, 6 yillik tanaffusdan keyin terma jamoaga qaytgan Karim Benzema boshchiligidagi alamzada (Yevro—2020 dagi muvaffaqiyatsizlikdan keyin) Fransiya dominant o‘yin ko‘rsatib, g‘oliblikni qo‘lga kiritdi. “Uch-ranglilar” finalda kuchga to‘lgan yosh Ispaniyani taslim qildi.
Yevropa chempionati g‘olibi Italiya esa 3-o‘rin uchun bahsda hech nima yutmagan Belgiyaning oltin avlodidan ustun keldi.
2024-yildan UEFA Millatlar Ligasida Janubiy Amerika vakillari ham ishtirok etadi. Ushbu ma’lumotni dekabr oyi o‘rtalarida UEFA vitse-prezidenti Zbignev Bonek tasdiqladi. Argentina, Braziliya, Kolumbiya, Peru, Urugvay va Chili A Ligada, Boliviya, Ekvador, Paragvay va Venesuela esa B Ligada ishtirok etishi kutilmoqda.
Shu tariqa UEFA Jahon Chempionatini har ikki yilda o‘tkazmoqchi bo‘layotgan FIFAga juda kuchli zarba berdi. Ha, UEFA ichki frontda grand klublar bilan, xalqaro maydonda esa FIFA bilan kurashmoqda.Messining yettinchi “Oltin to‘pi”
Fransiyaning France Football nashri 1960-yildan beri yil davomida eng yaxshi o‘yin ko‘rsatgan, jamoaviy va individual sovrinlarni qo‘lga kiritgan futbolchilarni taqdirlab keladi. Bu yilgi sovrin Lionel Messiga topshirildi, argentinalik daho uchun mazkur qimmatli to‘p hisob bo‘yicha yettinchisi bo‘ldi. Qayd etib o‘tib ketish kerak, bu borada uning eng yaqin ta’qibchisi Krishtianu Ronalduning hisobida beshta “Oltin to‘p” bor.
Sovrinning Messiga topshirilishi media olamida “yil o‘g‘irligi”, “yil qovuni”, “yil adolatsizligi” sifatida qayd etildi. Aksariyat mutaxassis va muxlislar sovrinni Robert Levandovski olishi kerak edi degan fikrni ilgari surdi. Boisi u 2021-yilda eng ko‘p gol urgan futbolchiga aylandi — 69 ta. Va butun yil davomida bir xil — yuqori darajada o‘yin ko‘rsatdi. Bundan tashqari, 2020-yil uchun ham “Oltin to‘p”ni Robert olishga haqli deganlar topildi. “Uyda o‘tirilgan” yilda France Football koronavirus tufayli tarixda ilk marta mukofotni hech kimga topshirmagandi. O‘shanda polshalikning g‘olib bo‘lish imkoniyati deyarli 100 foiz edi.Agueroning futbol bilan xayrlashishi
Odatiy kunlarning biri edi va “Barselona” 31-oktabr kuni La Liga doirasidagi o‘yinda o‘z maydonida “Alaves”ni qabul qilayotgandi. Uchrashuvning 41-daqiqasida Aguero o‘zini yomon his qildi. Shifokorlar uning yuragida muammo borligini ma’lum qildi va Kun zaxiraga olindi. O‘shanda hech kim Agueroni oxirgi marta maydonda ko‘rayotgani haqida o‘ylab ham ko‘rmagandi...
Dastlabki tibbiy ko‘rikdan so‘ng “Barselona” matbuot xizmati futbolchining ahvoli yaxshi ekanligi, ammo 3 oy davomida futbol o‘ynay olmasligi haqida ma’lumot berdi. Biroq oradan hech qancha o‘tmay, 15-dekabr kuni Agueroga yurak taxikardiyasi tashxisi qo‘yildi va uning boshqa maydonga qayta olmasligi aniq bo‘ldi.
Katta niyatlar bilan mavsum boshida “Barselona”ga kelgan Aguero ilk kunlardanoq muammodan boshi chiqmadi. Dastlab, qadrdon do‘sti Messi jamoadan ketgan bo‘lsa (aslida u Messi bilan birga o‘ynash uchun kelgandi), keyinchalik jarohat sabab uzoq vaqt maydonga tusha olmadi. Oxir-oqibat bir-yo‘la katta sport bilan xayrlashib qo‘ya qoldi. U matbuot anjumanida bu haqida ko‘zida yosh va alam bilan e’lon qildi...
Mana shunaqa, do‘stlar, 2021-yil futbol olami uchun shunday qayg‘uli xabar bilan yakunlandi.
Yil janglari
- MMA afsonasi Fyodor Yemelyanenko 2 yillik tanaffusdan oktagonga qaytdi. U amerikalik raqibi Timoti Jonsonni 1-raunddayoq dahshatli nokautga uchratdi.
- 2021-yilda ko‘pchilik Tayson Fyuri va Entoni Joshua qarama-qarshiligini kutgandi, ammo ularning ikkisi ham boshqa bokschilarga qarshi jang qildi. Fyuri dramatik jangda Deontey Uaylderni 11-raundda nokautga uchratgan bo‘lsa, Entoni Joshua Londonda Oleksandr Usikka yutqazib qo‘ydi. Usik ushbu g‘alabadan keyin britaniyalik bokschining ucta kamarini o‘ziniki qilib oldi.
- Ikki yillik tanaffusdan so‘ng ringga qaytgan Menni Pakyao ochkolar hisobiga kubalik bokschiga yutqazib qo‘ydi. Ushbu jangdan ko‘p o‘tmay filippinlik bokschi professional faoliyatini yakunlaganini e’lon qildi. Pakyao 2022-yilda Filippinda bo‘lib o‘tadigan prezidentlik sayloviga o‘z nomzodini qo‘ygan.
- Saul “Kanelo” Alvares esa 2021-yilda naq 3 ta jang o‘tkazdi va ularning barchasida g‘alaba qozondi. “Kanelo” fevral oyida Avni Yildirim, mayda yengilmas Billi Jo Sonders, noyabr oyida boshqa bir yengilmas jangchi Kaleb Plantni “yer tishlatdi”. Shu tariqa meksikalik jangchi supero‘rta vazn toifasida mutlaq chempionga aylandi. Alvares endilikda og‘ir vaznda ham jang qilish niyati borligini ma’lum qildi.
Izoh (0)