Arab mamlakatlari AQSHning Eronga ehtimoliy hujumlari uchun o‘z hududlarini bermasdan saqlanishlari lozim. Bu haqda Eron Tashqi ishlar vazirligi rasmiy vakili Ismoil Bag‘oiy Al Jazeera’ga bergan intervyusida ma’lum qildi.
Ma’lum qilinishicha, Tehron arab mamlakatlari AQSH harbiy kuchlari Eronga zarba bergan taqdirda, amerikaliklarga o‘z hududlaridan foydalanishga ruxsat bermasligiga umid qilmoqda.
“Arab mamlakatlari bilan munosabatlarimiz juda yaxshi. Ishonchimiz komilki, AQSH bazalari joylashgan arab mamlakatlari o‘z hududlaridan musulmon qo‘shnilariga qarshi hujumlar uchun foydalanishga yo‘l qo‘ymaydi”, degan Bag‘oiy.
Diplomatning so‘zlariga ko‘ra, AQSHning har qanday aralashuvi mintaqada keng ko‘lamli urush kelib chiqishiga sabab bo‘ladi.
Bag‘oiyning qo‘shimcha qilishicha, Eron muzokaraga tayyor, biroq endi Vashingtonga “ishonmaydi”. U Eronning boshqa mamlakatlar, jumladan BMT Xavfsizlik kengashi bilan aloqalarni davom ettirayotganini ham ta’kidlagan.
Bundan avval Eron prezidenti Mas’ud Pezeshkiyon AQSH Isroilning Eronga hujum qilishiga yo‘l qo‘yib, xalqaro huquqni buzganligini, mamlakat atom energiyasidan foydalanish va yadroviy tadqiqotlar o‘tkazish huquqiga ega ekanini bildirgandi.
Shuningdek, 20 ta arab va islom davlatlari tashqi ishlar vazirlari Isroilni harbiy harakatlarni to‘xtatishga chaqirgandi.
Izoh (0)