Livanda, Bayrut chekkasida qurilmalar ishtirokida navbatdagi portlashlar sodir bo‘ldi.
Bu safar ratsiyalar, uyali telefonlar, avtomobil magnitolalari va hatto uydagi quyosh batareyalari ham portlatilgani xabar qilingan.
Livan Sog‘liqni saqlash vazirligi tomonidan taqdim etilgan yangilangan ma’lumotlarga ko‘ra, simsiz aloqa qurilmalarining yangi to‘lqini portlashi oqibatida mamlakat bo‘ylab kamida 9 kishi halok bo‘lgan va 300 dan ortiq kishi jarohatlangan.
Avvalroq bunday portlashlardan kamida bittasi seshanba kuni peyjerlarning portlashi oqibatida halok bo‘lganlarning dafn marosimida sodir bo‘lgani xabar qilingan edi. Hukumat fuqarolardan portlash sodir bo‘lgan joylar yaqinida to‘planmaslikni so‘ragan.
Livan armiyasi qo‘mondonligi fuqarolarni poytaxtning janubiy hududlarida bo‘lish xavfidan ogohlantirgan. Harbiylar, shuningdek, tibbiy guruhlarning kelishi uchun joy ajratishga chaqirgan. Reuters’ga ko‘ra, qurbonlarning ko‘pchiligi qorin va qo‘llaridan yaralangan. Nashr tomonidan qo‘lga kiritilgan tasvirlarga ko‘ra, bugun portlagan ratsiyalarda ICOM va “Yaponiyada ishlab chiqarilgan” degan yozuv bo‘lgan.
Veb-saytga ko‘ra, ICOM - Yaponiyaning radio va telefon aloqa kompaniyasi.
Avvalroq Isroil qo‘shinlari bilan suhbatlashgan mamlakat mudofaa vaziri Yoav Galant so‘nggi kunlarda Livandagi elektron qurilmalar portlashi haqida hech narsa aytmagan. Shu bilan birga, u Isroil armiyasi va xavfsizlik xizmatlarining ishini yuqori baholab, “natijalar juda ta’sirli” ekanini ta’kidlagan.
Izoh (0)