Nigeriya hukumati 1995-yilda harbiy xunta tomonidan qatl etilgan to‘qqiz nafar ekologiya faolini, jumladan, yozuvchi Ken Saro-Vivani rasman afv etdi va vafotidan so‘ng mukofotladi.
Ma`lum qilinishicha, “Ogoni-to‘qqizlik” nomi bilan tanilgan guruh Niger deltasida Shell neft kompaniyasining vayronkor faoliyatiga qarshi kurashgan va to‘rt nafar mahalliy rahbarni nohaq o‘ldirganlikda ayblangan. Keyinchalik ma’lum bo‘lishicha, guvohlar pora evaziga sotib olingan va sud jarayoni adolatni qo‘pol ravishda buzgan.
Qatl xalqaro norozilikni keltirib chiqardi va Nigeriya Millatlar Hamdo‘stligidan chiqarildi. Shell aybni rad etgan, biroq 2009 yilda qurbonlarning qarindoshlari bilan tovon puli to‘lash bo‘yicha kelishuv imzolagan.
Prezident Bola Tinubu faollar kurashining ahamiyatini ta’kidlab, ularga davlat mukofotlarini topshirdi. Uning ta’kidlashicha, ularning qurbonligi mamlakat tarixida o‘chmas iz qoldirgan.
Saro-Viva oilasi hukumatga minnatdorlik bildirdi, biroq “afv etish” atamasi aybdorlikni anglatishini ta’kidladi. Yaqinlari ishni to‘liq qayta ko‘rib chiqish va faollarni rasman oqlashni talab qilmoqda.
“Ushbu mukofotlar yaqinlarimizning aybsizligini tasdiqlaydi va ularning qatl etilishi qonuniy qotillik bo‘lganini ko‘rsatadi. Biz hali ham ularning nomlarini butunlay tozalaydigan adolatli tergovni kutmoqdamiz”, dedi yozuvchining qizi Nuu Saro-Viva.
Izoh (0)