Nigeriya Favqulodda vaziyatlar boshqarmasining ma’lum qilishicha, Mokva shahrida suv toshqini yuz berganidan so‘ng qurbonlar soni 115 kishidan oshib ketgan. Bu haqda BBC xabar berdi.
Aholisi 3000 kishidan ortiq bo‘lgan 500 dan ortiq uy xo‘jaliklari zarar ko‘rgan. Ba’zilar ikki-besh nafargacha oila a’zolarini yo‘qotgani aytilmoqda. 1 nafar shaxs Niger daryosida cho‘kib ketgan. Qurbonlar yanada oshishi mumkinligi bildirilgan.
Mahalliy hokimiyat 11 kishi qutqarilib, shifoxonaga yetkazilganini ma’lum qilgan. Mokva shahrining Tiffin Maza va Anguvan Hausava tumanlari eng ko‘p zarar ko‘rganligi aytilmoqda. Ma’lum bo‘lishicha, bunday suv toshqini oxirgi marta 60 yil oldin bo‘lgan.
“Hukumatdan bizni qo‘llab-quvvatlashini so‘raymiz”, dedi zarar ko‘rgan hududlar rahbarlari.
Mamlakatning shimoliy va janubi-g‘arbiy qismlarini bog‘lovchi ko‘prik suv toshqinlari oqibatida qulab tushgan. Nigeriya prezidenti Bola Tinubu barcha tegishli favqulodda vaziyatlar va xavfsizlik organlariga davom etayotgan qidiruv-qutqaruv ishlarini kuchaytirishni buyurgan.
28-29-may kunlari mamlakatga kuchli yomg‘ir yog‘ib, sel oqimlari yopirilgan. Nigeriyada yomg‘irli mavsum endigina boshlanmoqda va odatda apreldan oktyabrgacha davom etadi. Rasmiylar mamlakatning 36 shtatidan kamida 15 tasida kuchli jala yog‘ishi haqida ogohlantirgan.
Izoh (0)