Nigeriyaning Niger shtatida joylashgan Mokva savdo shaharchasida kuchli yomg‘irlar va undan keyin yuz bergan suv toshqini oqibatida kamida 88 kishi halok bo‘lgan. Bu haqda The Associated Press nashri xabar bermoqda.
Minna shahar Favqulodda vaziyatlar boshqarmasi rahbari Isah Husseinining bildirishicha, qutqaruv ishlari davom etmoqda, biroq ko‘plab fuqarolar hali ham xavf ostida qolmoqda. Dastlabki xabarlarda 20 nafar halok bo‘lgan fuqaro haqida aytilgan bo‘lsa-da, hodisa ko‘lami kengaygani sari qurbonlar soni ortmoqda.
“Qurbonlar soni oshib bormoqda. Oxirgi hisob-kitoblarga ko‘ra, 88 jasad topildi”, deydi Isah Husseini.
Mahalliy nashrlarning xabar berishicha, toshqinlarga bir necha soat davom etgan kuchli yomg‘ir sabab bo‘lgan, shuningdek, yaqin atrofdagi shaharchada joylashgan to‘g‘on qulash holatini yanada og‘irlashtirgan. Suv toshqini infratuzilmaga zarar yetkazgan va 50 ga yaqin turar joy binolarini suv bosgan.
Mokva shaharchasi Nigeriyaning janubiy hududlaridan kelgan savdogarlar va shimoldagi qishloq xo‘jaligi ishlab chiqaruvchilari uchun muhim savdo nuqtasi hisoblanadi.
Nigeriya har yili yomg‘ir mavsumida, ayniqsa Niger va Benue daryolari bo‘yida joylashgan hududlarda, suv toshqinlariga duch keladi. Mutaxassislar bunday hodisalarni iqlim o‘zgarishlari va infratuzilma zaifligi bilan bog‘lamoqda.
Bundan avval Hindistonning Uttar-Pradesh shtatida momaqaldiroqli jala oqibatida kamida 45 kishi hayotdan ko‘z yumgani, poytaxt Dehlida yog‘gan kuchli jala va yirik do‘l oqibatida besh kishi halok bo‘lgani ma`lum qilingandi.
Avstraliyaning janubi-sharqida yog‘gan yomg‘ir qisqa muddatli toshqinlarni keltirib chiqargan, ko‘plab shaharlarni tashqi dunyodan uzib qo’ygan va aholi uy tomlarida jon saqlayotgani xabar qilingandi.
May oyi boshida Kongo Demokratik Respublikasida yuz bergan suv toshqinlari oqibatida esa 100 dan ortiq odam halok bo‘ldi.
Izoh (0)