Ushbu sportchilar stadionlarda rekordlar o‘rnatishdi, endi esa Forbesʼni zabt etishmoqda. Quyida sport bilan parallel ravishda yoki sportdan ketgandan so‘ng millionlab daromad keltiradigan biznes qurganlar haqida hikoya qilanadi.
Ular stadionda g‘alaba nashidasini surishdi, ammo haqiqiy o‘yinni biznes olamida boshlashdi. Kuboklar o‘rniga — o‘z brend va kompaniyalari, muxlislar o‘rniga — millionlab mijozlarga ega bo‘ldilar. Daromadlari barcha sport mukofotlaridan ustun bo‘lgan, o‘z biznes imperiyalarini yaratgan 5 nafar sportchi haqida so‘z yuritamiz.
Mariya Sharapova: konfetlar va investitsiyalar
2012-yilda, hali faoliyatini yakunlamasdan turib, tennischi Mariya Sharapova Sugarpova konfet brendini ishga tushirdi va shirinliklarni premium mahsulotga aylantirdi. Ushbu brend ostida lab shaklidagi marmelad, oltin folgali shokolad va hatto tennis to‘plari shaklidagi saqichlar ishlab chiqardi. Kompaniya dastlab 500 ming dollar sarmoya kiritib, yiliga taxminan 20 million dollar daromad olgan. Ammo 2021-yilda Sharapova qandolatchilik biznesini sotib, boshqa yo‘nalishlarga o‘tib ketdi.
Hozirda u turli xil loyihalarga sarmoya kiritmoqda: bolalar mebeli brendi, fitnes bilaguzuklari, ko‘chmas mulk, trenajyorlar va sport jihozlari ishlab chiqarish, sog‘lomlashtirish mahsulotlari, mobil ilova va boshqalar shular jumlasidandir. Shuningdek, Sharapova 2024-yilda kriptovalyuta bitimlari amalga oshiriladigan investitsiya platformasidagi ulushini sotib olgan. Aytgancha, Sharapova Forbes reytingiga eng boy ayollardan biri sifatida bir necha bor kirgan.
Lebron Jeyms: Pitsa biznesi
Basketbolchi Lebron Jeyms sport karyerasi bilan parallel ravishda biznes qurishni boshladi. 2012-yilda u Blaze Pizza pitseriyalar tarmog‘iga sal kam 1 million dollar sarmoya kiritdi va muvaffaqiyatga erishdi. To‘rt yildan so‘ng kompaniya AQSHdagi eng tez rivojlanayotgan kompaniyaga aylandi: 2 tadan 200 tagacha restoran ochishga erishildi. Jeymsning ulushi endi 35 million dollarga baholanmoqda.
Pitseriyalar tarmog‘iga egalik qilishdan tashqari, Lebron Jeyms virtual reallik texnologiyasini ishlab chiquvchi kompaniyaga velosiped ishlab chiqarishga sarmoya kiritdi va “Liverpul” futbol klubidagi ulushini sotib oldi.
Lebron Jeyms milliarder darajasiga erishgan birinchi NBA o‘yinchisi hisoblanadi. Forbes hisob-kitoblariga ko‘ra, 2025-yilda Lebron Jeyms aktivlarining sof qiymati 1,2 milliard dollarni tashkil etadi.
Krishtianu Ronaldu: fitnes klublar, mehmonxonalar va o‘z nomi ostidagi kiyimlar
Bugungi kunda Krishtianu Ronaldu dunyoning eng ko‘p maosh oluvchi sportchisi hisoblanadi. Ammo uning biznesdan oladigan daromadi Saudiya Arabistonining “Al-Nasr” klubidagi maoshidan ham ko‘p. 2006-yilda futbolchi CR7 shaxsiy savdo belgisini ishga tushirdi, uning ostida kiyim-kechak, poyabzal, parfyumeriya va aksessuarlar ishlab chiqariladi.
Oradan 10-yil o‘tib, Ronaldu mehmonxona biznesiga muvaffaqiyatli kirib keldi va Pestana CR7 Hotel mehmonxonalar tarmog‘ining hammuallifiga aylandi (uning ulushi 50%). CR7 brendi ostida futbolchi fitnes klublar tarmog‘ini ochgan. Turli hisob-kitoblarga ko‘ra, 2025-yilda CR7 brendining qiymati 850 million yevroga baholanmoqda.
Shuningdek, Ronaldu soch ko‘chirib o‘tkazish klinikasining hammuallifi va investori hamdir: u IT-kompaniyaga va FIFA raqibi bo‘lgan futbol simulyatorini ishlab chiqishga sarmoya kiritgan.
Darvoqe, Ronalduning o‘zi u uchun biznes futboldan ko‘ra qiyinroq ekanini tan oladi: “Futbolda men ko‘proq nazoratga egaman. Biznesda hamma narsa murakkabroq: siz boshqa odamlarga qaramsiz. Lekin menda yaxshi jamoa bor”, deydi portugaliyalik futbolchi.
Serena Uilyams: venchur fondi (bu yuqori tavakkalchilik va sezilarli o‘sish salohiyatiga ega startaplar va innovatsion loyihalarga sarmoya kiritadigan investitsiya fondi), make up va sport
O‘z brendini yo‘lga qo‘ygan yana bir sportchi — tennischi Serena Uilyams. 2018-yilda u o‘zining sport karyerasida S by Serena kiyim-kechak liniyasini yaratdi.
2022-yilda nafaqaga chiqqanidan so‘ng esa, investitsiya bilan shug‘ullangan. U startaplarga sarmoya kiritadigan Serena Ventures venchur fondini ochdi. 2024-yilda u yana bir brendni ishga tushirdi — bu safar o‘zining dekorativ kosmetikasini dunyoga taqdim etdi.
Biznesning yana bir yo‘nalishi — sport klublaridagi ulushlar. Tennis faoliyati davomida sportchi Milliy ayollar futbol ligasi “Engel Siti” va NFL “Mayami Dolfins” aksiyalarini sotib olgan. 2025-yilda Williams Kanadaning Ayollar milliy basketbol assotsiatsiyasining Toronto Tempo klubiga egalik qildi. 2025-yilda Serena Uilyamsning biznes loyihalari 340 million dollarga baholanmoqda.
Devid Bekxem: futbol klubi va asalarichilik
Bugungi kunda Devid Bekxem eng boy sobiq sportchilardan biri hisoblanadi. U “Real Madrid” futbolchisi bo‘lganidayoq Adidas bilan umrbod shartnoma imzolagan. Hatto futbolchilik faoliyatini yakunlaganidan keyin ham Devid sotuvdan foiz oladi.
Shuningdek, sobiq sportchi ikkita kompaniyaga egalik qiladi: biri televideniye va ijtimoiy tarmoqlar uchun kontent ishlab chiqaradi, ikkinchisi esa kibersport tashkiloti. Bundan tashqari, Bekxem sarmoya kiritadi: masalan, 2024-yilda u dori-darmon ishlab chiqaruvchi kompaniyaga sarmoya kiritdi.
Ammo Bekxemning eng asosiy biznesi o‘zi ham egalik qiladigan “Inter Mayami” futbol klubi hisoblanadi. Forbes hisob-kitoblariga ko‘ra, jamoaning qiymati 1 milliard dollardan oshadi.
Bundan tashqari, Bekxem asalarichilik bilan shug‘ullanadi va asal sotishni rejalashtirmoqda. U allaqachon o‘z biznesining katta qismini nazorat qiluvchi DB Ventures kompaniyasi orqali brendni ro‘yxatdan o‘tkazgan.
“Biz o‘z mehnatimizni muvaffaqiyatli biznesga aylantirdik va bu men sportchi bo‘lganim, keyin esa qatʼiyat bilan ishbilarmonlik tomonini o‘rgana boshlaganim tufaylidir. Yoningizda kerakli odamlar va to‘g‘ri biznes hamkorlar bo‘lishi muhim”, deydi Devid.
Ushbu beshta hikoya shuni ko‘rsatadiki, sportdagi muvaffaqiyat haqiqiy boylik sari qo‘yilgan birinchi qadamdir. Bu “muvaffaqiyatli sarmoya tikish” haqida emas, balki shuhrat va tavakkalchilikni pulga aylantirish qobiliyatidir.
Izoh (0)