Mark Sukerberg rafiqasi uchun noyob avtomobil buyurtma qildi

Meta kompaniyasi bosh direktori Mark Sukerberg rafiqasi Pritsilla Chan uchun noyob avtomobil buyurtma qildi. Pritsilla oilaviy sayohatlar uchun mini­ven istagan, biroq standart modellar uning ehtiyojlarini qondirmagan. Shuning uchun Mark Sukerberg mini­venning qulayligi bilan sport avtomobilining unumdorligini birlashtirgan noyob avtomobil yaratishga qaror qilgan. U buning uchun Porsche kompaniyasi va mashhur West Coast Customs tuning studiyasiga murojaat qilgan.

Bu avtomobilning o‘ziga xosligi nimada?

Asos sifatida Porsche Cayenne Turbo GT olinib, uni mini­venga aylantirish uchun modifikatsiya qilingan. Avtomobil uzunroq korpus va yon tomonga tortib ochiladigan eshiklarga ega bo‘lib, bu uni oilaviy sayohatlar uchun yanada qulay qiladi.

Kapot ostida kuchli, 4,0 litrli, ikki turbinali V8 dvigateli joylashgan bo‘lib, yuqori unumdorlikni ta’minlaydi. Ichki qismida sport uslubidagi uch qator o‘rindiqlar mavjudligi sababli, u oilaga keng va qulay joy taklif etadi.

Cayenne Turbo GT o‘zining dizayni va texnik xususiyatlari tufayli modifikatsiyalash uchun juda qulay imkoniyatlarga ega. Mashhur tuning studiyasi West Coast Customs esa avtomobil korpusini uzaytirib, elektr eshiklarni o‘rnatdi. Bu esa uni oilaviy sayohatlar uchun yanada qulay qildi.

Mini­vendan tashqari, Sukerberg o‘ziga ham Porsche 911 GT3 Touring modelini buyurtma qilgan. Bu bilan milliarderning garajidagi avtomobillar soni yana bittaga ko‘payadi. 

Mark Sukerberg va Pritsilla Channing garajidagi boshqa avtomobillar

Mark Sukerberg va Pritsilla Channing garaji nafaqat hashamatli, shu bilan birga foyalanish uchun qulay bo‘lgan avtomobillarni o‘z ichiga oladi. Ularning avtomobil parkidagi ba’zi mashinalar quyidagilar:

1. Acura TSX
   O‘rta o‘lchamdagi sedan, ishonchliligi va qulayligi bilan mashhur. 2,4 litrli to‘rt silindrli dvigatel va 5 tezlikka ega uzatmalar qutisi bilan jihozlangan.

2. Volkswagen Golf GTI
   Sportga oid xususiyatlar bilan kundalik foydalanishga mos ixcham hatchback. O‘zining manyovr va yonilg‘i tejash qobiliyati bilan tanilgan.

3. Honda Fit
   Ixcham avtomobil bo‘lib, yonilg‘i tejamkorligi va sig‘imi bilan ajralib turadi. 

4. Pagani Huayra
   Ikkita o‘rindiqli hashamatli sportkar bo‘lib, kolleksiyasining eng qimmatbaho qismi hisoblanadi. Bu avtomobilning narxi 1 million dollardan boshlanadi. U eksklyuzivligi bilan tanilgan.

Mark Sukerbergning avtomobillar tanlovi uning hayotga nisbatan muvozanatli yondashuvini aks ettiradi. U sodda bo‘lish bilan birga, yuqori sifat va noyoblikni qadrlaydi. Milliarder ortiqcha e’tibor tortmaydigan, ammo kundalik foydalanish uchun qulay va ishonchli avtomobillarni afzal ko‘radi.