Elmurod Haqnazarov “Xalqlar do‘stligi” saroyida “Djigar” nomli navbatdagi yakkaxon konsertini muxlislari eʼtiboriga havola qilyapti. Dastur qanday yangiliklar bilan o‘tdi? “Daryo” muxbiri konsertning uchinchi kunida qatnashib, reportaj tayyorladi.
Konsert avvalgi yili uch kun bo‘lgan bo‘lsa, bu yil to‘rt kunlik seans bilan o‘tyapti. “Xalqlar do‘stligi” saroyiga saviyali hazil shinavandalari, jaydari yigitlar yig‘ildi. Zalning yarmidan ko‘pini esa Elmurod Haqnazarovning vodiylik muxlislari egalladi.
— Bu hech qanday paxta yoki to‘qima gap emas — meni qo‘llab turgan har kungi muxlislarimdan faxrlanaman va ularga rahmat aytaman. Uch soat davomida joylaridan jilmasdan, uchinchi soatda ham baqir-chaqir qilib, energiyaga to‘la o‘tirishibdi. Aqlli hazillarga ham tushunib, joy-joyida qarsak chalishyapti. Kamchiliklar menda bo‘lyapti, tomoshabinda emas, dedi Elmurod Haqnazarov konsert avvalida.
Konsertga “Dizayn” jamoasi aʼzolari Davron Kabulov, stendap komik Mirshakar Fayzulloyev, blogerlar Dilshod Nazarov, Ulug‘bek Shodiyev va boshqalar tashrif buyurdi.
— Ko‘pchilik, konsert futbol haqida bo‘lyapti deb o‘ylashi mumkin. Yo‘q, futbol haqidagi hazillarning hammasini qo‘shsa, olti daqiqaga ham bormaydi aslida. Konsert futbol haqida emas. Balki farzand tarbiyasi, ota-onaga hurmat, o‘zimizdagi kamchiliklar hamda yigit va qiz o‘rtasidagi muammolar haqida. Eng asosiy nuqta — kitob mavzusi. Kitob haqidagi hazillarimdan so‘ng ozroq pauza qilyapman — to‘rt mingta odam bir daqiqa tinmay qarsak chalyapti. Kim mingtadan ortiq kitob o‘qigan, dedim, uch kishi qo‘l ko‘tardi. Oddiy savol-javob qildim va iPhone 16 berib yubordim. Bugun ham xuddi shu telefondan topshiramiz, dedi qiziqchi.
Mehmon xonanda sifatida Mirjalol Ne’matov sevgi haqidagi taronalarini jonli ijroda kuyladi.
— Konsertdan avval “Farzandlar ota-onasiga konsertdan keyin qo‘ng‘iroq qilib, albatta, ularni yaxshi ko‘rishini aytadi“, deb niyat qilib qo‘ygandim. Buning uddasidan chiqdim. Ota-onalar esa “Bugundan farzandimga boshqacha tarbiya beryapman”, deb yozayotganini ko‘rib maqsadimga ikki barobar erishganimni bildim, dedi Haqnazarov.
Elmurod Haqnazarovning “Qoch, Barsa kelyapti” jumlasi Instagramʼda trend darajasiga ko‘tarildi. “Real Madrid” va “Barselona” jamoalari o‘yinidan so‘ng muxlislar tomonidan futbol haqidagi video izohiga shu jumlani yozish urfga kiryapti.
Konsertning eng kutilgan voqeasi Jahongir Poziljonov va Elmurod Haqnazarov o‘rtasidagi o‘zaro shart berish va bajarish sahnasi bo‘lgan bo‘ldi. Shartlar har kuni bir xil bo‘ladimi yoki o‘zgarib turadimi?
— Mening birinchi shartim — sahnada Jahongir aka “Barselona”ning formasini kiyishi kerak. Ikkinchisi esa sahnada jonli ijroda kuylashi lozim. Ikki shartimni ham juda yaxshi uddalayapti. Tomoshabinlar orasida “Real”chilar ko‘p ekan, baqir-chaqir qilib qo‘llab-quvvatlab turishibdi, deydi qiziqchi.
Izoh (0)