Toshkentda konsertlar mavsumi davom etmoqda. Galdagi konsert dasturlarini katta qismi jonli ijroda bo‘lib o‘tadi. Xo‘sh, yaqin oylarda qaysi xonandalar konsert beradi hamda ularning chipta narxlari qancha?
“Million” jamoasi
“Million” kulgi jamoasi “Xalqlar do‘stligi” saroyida 1-11-aprel kunlari navbatdagi konsert dasturini o‘tkazadi. Jonli ijroda o‘tadigan tomoshaning chipta narxi 44 mingdan 770 minggacha belgilangan.
Shohjahon Jo‘rayev
Jo‘rayevlar sulolasi vakili Shohjahon Jo‘rayev 11-13-aprel kunlari jonli ijrodagi konsert dasturini muxlislari e’tiborga havola qiladi. “Xalqlar do‘stligi”da bo‘lib o‘tadigan kecha “Sherali Jo‘rayev qo‘shiqlari” deb nomlangan. Uch kunlik konsert chipta narxi 200 ming so‘mdan 450 ming so‘mgacha belgilangan.
Roza Zargarli
Birgina “Istedim” taronasi bilan nafaqat Ozarbayjonda, balki MDH mamlakatlari orasida ham olamshumul mashhurlikka erishgan Roza Zargarli o‘zbek tinglovchilari uchun konsert dasturini taqdim etadi. 14-15-aprel kunlari muhtasham “Xalqlar do‘stligi” saroyida bo‘lib o‘tadigan konsert chiptalarini 105 ming so‘mdan 1 million 260 ming so‘mgacha xarid qilishingiz mumkin. “Istedim” nomli dastur to‘liq jonli ijroda bo‘lib o‘tadi.
Xurshid Rasulov
Xonanda Xurshid Rasulov 17-20-aprelda “Retro” nomli to‘rt kunlik konsert dasturini o‘tkazadi. Chipta narxlari 30 ming so‘mdan 400 ming so‘mgacha belgilangan. Dastur to‘liq jonli ijroda bo‘lib o‘tadi.
“Mavsum xitlari” taqdimoti
“Xalqlar do‘stligi”da 21-22-aprel kunlari bo‘lib o‘tadigan “Mavsum xitlari” taqdimot marosimida eng munosiblar taqdirlanadi. Chiptalar 50 ming so‘mdan 500 ming so‘mgacha etib belgilangan.
Maksim
Rossiyalik yulduz Maksim 26-aprel kuni “Humo arena”da jonli ijrodagi konsertini taqdim etadi. Chiptalar 400 ming so‘mdan 1 million 300 ming so‘mgacha baholangan.
Yulduz Turdiyeva
Xushovoz xonanda Yulduz Turdiyeva 26-27-aprel sanasida ilk yakkaxon konsert dasturini taqdim etadi. Jonli ijrodagi o‘zbekcha-yu tojikcha qo‘shiqlardan bahramand bo‘lishni istasangiz chiptalarni 44ming so‘mdan 770 ming so‘mgacha xarid qilishingiz mumkin.
“Benom” guruhi
Bir yilda ikki marta konsert beradigan “Benom” guruhi 30-apreldan 5-maygacha navbatdagi “The best 3” ni muxlislari e’tiboriga havol qiladi. To‘liq jonli ijroda o‘tadigan konsert chiptalari narxi 50 ming so‘mdan 450 ming so‘mgacha belgilangan.
Vera Brejneva
Rossiyalik xonanda Vera Brejneva o‘zbekistonlik muxlislari uchun 1-may sanasida konsert dasturini taqdim etadi. Dastur O‘zbekiston Milliy kino san’ati saroyida jonli ijroda bo‘lib o‘tadi. Chiptalarni 200 mingdan 950 ming so‘mgacha xarid qilishingiz mumkin.
Sevara Nazarxon
O‘ziga xos yo‘nalishga ega Sevara Nazarxonning bu yilgi konserti 2-4-may kunlari “Humo arena”da bo‘lib o‘tadi. Jonli ijrodagi dasturning chiptalari 100 ming so‘mdan 1 million so‘mgacha belgilangan.
Ozoda Nursaidova
Ko‘plab xit taronalar muallifi Ozoda Nursaidova 7-16-may kunlari “Xalqlar do‘stligi” saroyida navbatdagi shou-konsertini taqdim etadi. O‘n kunlik konsert to‘liq jonli ijroda o‘tkazilib, chiptalar narxi 40 mingdan 500 ming so‘mgacha belgilangan.
Jahongir Otajonov
Jahongir Otajonov muxlislari uzoq kutgan konsert dasturini 10-may kuni “Humo arena” da taqdim etadi. Qo‘shiqlar 100 foiz jonli ijroda kuylanadi, chiptalarini esa 150 ming so‘mdan 850 ming so‘mgacha xarid qilishingiz mumkin.
Elmurod Haqnazarov
Taniqli kulgi ustasi Elmurod Haqnazarov 17-20-may kunlari “Xalqlar do‘stligi” san’at saroyida “Djigar” nomli konsert dasturini taqdim etadi. “Yangisidan” eshitmoqchi bo‘lsangiz chiptalarni 40 ming so‘mdan 400ming so‘mgacha xarid qilishingiz mumkin.
Filarmoniya shou
Bitiruvchilar uchun har yili tashkil qilinadigan Filarmoniya shou 22-may kuni “Humo arena” da bo‘lib o‘tadi. Chiptalar 60 ming so‘mdan 300 minggacha etib belgilangan. Konsert jonli ijroda bo‘lib o‘tadi.
Jaloliddin Ahmadaliyev
Xonanda Jaloliddin Ahmadaliyev 26-30-may kunlari “Xalqlar do‘stligi” san’at saroyida “Shunday o‘tib ketmasmiz” nomli konsert dasturini o‘tkazadi. Jonli ijrodagi konsert chiptalar narxi 200 ming so‘mdan 450 ming so‘mgacha baholangan.
“Bolalar” guruhi
Afsonaviy “Bolalar” guruhi yakkaxoni Tohir Sodiqov an’anaga sodiq qolgan holda 1-iyunda muxlislari uchun navbatdagi konsertini taqdim etadi. 35 yillik yubiley konsert “Humo arena” da bo‘lib o‘tadi. Chiptalar 120 ming so‘mdan 450 ming so‘mgacha baholangan. Konsertda fonogrammadan foydalaniladi.
Sergey Lazarev
Rossiyalik yulduz Sergey Lazarev 1-iyunda “Xalqlar do‘stligi” sahnasida kuylaydi. Xonanda o‘zbekistonlik muxlislariga jonli ijrodagi shou-konsertni taqdim etadi. Chiptalarni 280 ming so‘mdan 1 million 400 ming so‘mgacha xarid qilishingiz mumkin.
Otabek Muhammadzohid
“Sendaqasi yo‘q” xit taronasi muallifi Otabek Muhammadzohid 3-4-iyun kunlari “Xalqlar do‘stligi” saroyida yakkaxon konsert dasturini o‘tkazadi. Jonli ijrodagi konsert chiptalarini 50 ming so‘mdan 500 ming so‘mgacha xarid qilishingiz mumkin.
Hulkar Abdullayeva
Xorazmlik xonanda Hulkar Abdullayeva 7-8-iyun kunlari “Xalqlar do‘stligi” san’at saroyida muxlislari e’tiboriga konsert dasturini taqdim etadi. Chiptalar 50 ming so‘mdan 400 ming so‘mgacha bo‘lib, konsert to‘liq jonli ijroda o‘tkaziladi.
Izoh (0)