Элмурод Ҳақназаров “Халқлар дўстлиги” саройида “Джигар” номли навбатдаги яккахон концертини мухлислари эътиборига ҳавола қиляпти. Дастур қандай янгиликлар билан ўтди? “Дарё” мухбири концертнинг учинчи кунида қатнашиб, репортаж тайёрлади.
Концерт аввалги йили уч кун бўлган бўлса, бу йил тўрт кунлик сеанс билан ўтяпти. “Халқлар дўстлиги” саройига савияли ҳазил шинавандалари, жайдари йигитлар йиғилди. Залнинг ярмидан кўпини эса Элмурод Ҳақназаровнинг водийлик мухлислари эгаллади.
— Бу ҳеч қандай пахта ёки тўқима гап эмас — мени қўллаб турган ҳар кунги мухлисларимдан фахрланаман ва уларга раҳмат айтаман. Уч соат давомида жойларидан жилмасдан, учинчи соатда ҳам бақир-чақир қилиб, энергияга тўла ўтиришибди. Ақлли ҳазилларга ҳам тушуниб, жой-жойида қарсак чалишяпти. Камчиликлар менда бўляпти, томошабинда эмас, деди Элмурод Ҳақназаров концерт аввалида.
Концертга “Дизайн” жамоаси аъзолари Даврон Кабулов, стендап комик Миршакар Файзуллоев, блогерлар Дилшод Назаров, Улуғбек Шодиев ва бошқалар ташриф буюрди.
— Кўпчилик, концерт футбол ҳақида бўляпти деб ўйлаши мумкин. Йўқ, футбол ҳақидаги ҳазилларнинг ҳаммасини қўшса, олти дақиқага ҳам бормайди аслида. Концерт футбол ҳақида эмас. Балки фарзанд тарбияси, ота-онага ҳурмат, ўзимиздаги камчиликлар ҳамда йигит ва қиз ўртасидаги муаммолар ҳақида. Энг асосий нуқта — китоб мавзуси. Китоб ҳақидаги ҳазилларимдан сўнг озроқ пауза қиляпман — тўрт мингта одам бир дақиқа тинмай қарсак чаляпти. Ким мингтадан ортиқ китоб ўқиган, дедим, уч киши қўл кўтарди. Оддий савол-жавоб қилдим ва iPhone 16 бериб юбордим. Бугун ҳам худди шу телефондан топширамиз, деди қизиқчи.
Меҳмон хонанда сифатида Миржалол Неъматов севги ҳақидаги тароналарини жонли ижрода куйлади.
— Концертдан аввал “Фарзандлар ота-онасига концертдан кейин қўнғироқ қилиб, албатта, уларни яхши кўришини айтади“, деб ният қилиб қўйгандим. Бунинг уддасидан чиқдим. Ота-оналар эса “Бугундан фарзандимга бошқача тарбия беряпман”, деб ёзаётганини кўриб мақсадимга икки баробар эришганимни билдим, деди Ҳақназаров.
Элмурод Ҳақназаровнинг “Қоч, Барса келяпти” жумласи Instagram’да тренд даражасига кўтарилди. “Реал Мадрид” ва “Барселона” жамоалари ўйинидан сўнг мухлислар томонидан футбол ҳақидаги видео изоҳига шу жумлани ёзиш урфга киряпти.
Концертнинг энг кутилган воқеаси Жаҳонгир Позилжонов ва Элмурод Ҳақназаров ўртасидаги ўзаро шарт бериш ва бажариш саҳнаси бўлган бўлди. Шартлар ҳар куни бир хил бўладими ёки ўзгариб турадими?
— Менинг биринчи шартим — саҳнада Жаҳонгир ака “Барселона”нинг формасини кийиши керак. Иккинчиси эса саҳнада жонли ижрода куйлаши лозим. Икки шартимни ҳам жуда яхши уддалаяпти. Томошабинлар орасида “Реал”чилар кўп экан, бақир-чақир қилиб қўллаб-қувватлаб туришибди, дейди қизиқчи.
Изоҳ (0)