Tez ayniydi: muzlatkich eshigida saqlash mumkin bo‘lmagan 7 ta mahsulot

Kuniga necha marta muzlatkichni ochasiz? Besh? O‘n marta? Endi bu raqamni oila a’zolaringiz soniga ko‘paytiring. Har safar eshik ochilganda uning ichki qismi biroz isiydi, keyin yana soviydi. Ayrim mahsulotlar uchun bunday harorat o‘zgarishlari juda zararli: ular bakteriyalar ko‘payishiga, mahsulotning buzilishiga va ta’mning o‘zgarishiga olib keladi. Quyida muzlatkich eshigida saqlash mumkin bo‘lmagan 7 mahsulotni sanab o‘tamiz.

1. Tuxum

Ko‘pchilik muzlatkichlarda tuxum uchun alohida bo‘lim mavjud. Ammo bu asosan marketing usuli bo‘lib, amalda foyda bermaydi. Tuxum harorat o‘zgarishiga juda sezgir mahsulot. Muzlatkich tez-tez ochilganda uning qobig‘ida kondensat hosil bo‘ladi, bu esa mikroblarning mayda yoriqlardan ichkariga kirishiga imkon yaratadi.

Qayerda saqlash kerak: o‘rta javonda, orqa devorga yaqin joyda.

2. Sut

Sut ham yaroqlik muddati tez tugaydigan mahsulotlardan. Eshikning doimo ochilib-yopilishi tufayli u yerdagi javon harorat tez-tez o‘zgaradi, bu esa sutning tez aynishiga olib keladi. Issiq kunlarda esa bu jarayon bir necha barobar tezlashadi.

Qayerda saqlash kerak: asosiy kameraning chuqur qismida, iloji bo‘lsa, eng pastki qismida. Chunki bu yer muzlatgichning eng sovuq joyidir.

3. Yogurt

Kichkina stakan yoki idishlardagi yogurtlarni eshikka qo‘yish qulaydek tuyuladi. Ammo bu ham noto‘g‘ri fikr.

Qayerda saqlash kerak: sut bilan bir qatorda — pastki yoki o‘rta javonda, orqa devorga yaqin joyda.

4. Pishloq

Pishloqlar ham haroratning “sovuq-issiq-sovuq” qabilida o‘zgarishiga chidamli emas. Buning oqibatida ta’mini o‘zgartiradi yoki taxirlashadi.

Qayerda saqlash kerak: o‘rta javonda, yopiq idishda.

5. Kolbasa mahsulotlari

To‘g‘ri, xom go‘sht, tovuq va baliq eshikka sig‘maydi, ammo ba’zilar tilim kolbasa va sosiska mahsulotlarini eshik javoniga qo‘yadi. Bunday joy xavfli bakteriyalar uchun qulay bo‘lishi mumkin.

Qayerda saqlash kerak: maxsus go‘sht bo‘limida yoki pastki javonda.

6. Smetana, qaymoq yoki tuxum asosidagi souslar

Sut yoki tuxum qo‘shilgan souslar (masalan, mayonez) juda nozik va tez buziladigan mahsulotlardir. Muzlatgich eshigida ular bakteriyalar tarqalishi uchun ideal sharoit yaratadi.

Qayerda saqlash kerak: muzlatkich ichida, orqa devorga yaqin joyda. Qopqog‘ini mahkam yopish yoddan chiqmasin.

Unda muzlatkich eshigida nimalarni saqlash mumkin?

• ketchup, xantal, soya sousi;
• sirka, sut/tuxum qo‘shilmagan souslar;
• konservalar;
• tuzlangan bodring;
• germetik idishdagi ichimliklar;
• sariyog‘ — unda yog‘ ko‘p, namlik kam, shu sababli u sutga qaraganda bakteriyalar tarqalishiga kamroq moyil bo‘ladi.