O‘zbekistonda 2025-yilda 5,2 million fuqaroni ish bilan taʼminlash, 1,5 million kishini kambag‘allikdan chiqarish rejalashtirilgan. Bu haqda Prezidentning iqtisodiy siyosat bo‘yicha maslahatchisi o‘rinbosari – Iqtisodiy tadqiqotlar va islohotlar markazi direktori Obid Hakimov “Iqtisodiy sharh” jurnaliga yozgan maqolasida maʼlum qilgan.
Obid Hakimov tahliliga ko‘ra, joriy yilda mamlakatdagi 60 ta tuman va shahar birinchi marta kambag‘allik va ishsizlikdan xoli hududlarga aylanishi kutilmoqda. Mikromoliyalashtirish dasturlariga 10 trillion so‘m, mahallalar infratuzilmasiga esa 1,6 milliard dollar yo‘naltiriladi.
2024—2025-yillarda o‘zini o‘zi band qilganlarni va kichik biznesni qo‘llab-quvvatlash uchun mikrokreditlar ko‘rinishida 10 trillion so‘m ajratiladi. 50 ming gektar yer maydoni 100 mingta kam taʼminlangan oilaga dehqonchilik va bog‘dorchilik uchun taqsimlab beriladi, buning uchun 5 trillion so‘m ajratiladi. Kichik va o‘rta biznes sektorida 2025-yilda uning iqtisodiyotdagi ulushini 55 foizga oshirish, 1,5 million yangi ish o‘rni yaratish, eksport hajmini 9 milliard dollardan 12 milliard dollarga ko‘paytirish, yirik korxonalar sonini 4 mingtaga yetkazish ko‘zda tutilgan, deyiladi maqolada.
Maqolada respublikada 250 ming bo‘sh ish o‘rni mavjudligiga qaramay, ularni kam taʼminlangan oilalar mehnatga layoqatli aʼzolarining 35 foizi malakasi yo‘qligi yoki sog‘lig‘i yomonligi sabab egallay olmasligi urg‘ulangan. Bunday oilalarning 83 foizi o‘z tomorqasiga ega, lekin suv, elektr energiyasi va infratuzilma yetishmasligi tufayli imkoniyatlari cheklangani yozilgan.
Muallif O‘zbekistonning xalqaro iqtisodiy erkinlik indeksi (The Heritage Foundation) to‘g‘risida ham qisqacha to‘xtalgan. 2025-yilgi maʼlumotlarga ko‘ra, O‘zbekiston 58 ball to‘plab, 184 ta mamlakat orasida 100-o‘rinni egallagan. Bu, mamlakat 2020-yilga nisbatan o‘z mavqeini 14 pog‘onaga yaxshilaganini anglatadi. Indeks mulk huquqlarini himoya qilish, sud ishlari samaradorligi, soliq yuki, biznes olib borish erkinligi, mehnat bozori va investitsiyalar erkinligi kabi 12 ta ko‘rsatkich asosida tuziladi.
Iqtisodiyot va moliya vazirligi joriy yil I yarmida O‘zbekistonda 3 million 44 ming fuqaro ish bilan taʼminlanganini maʼlum qilgandi. Vazirlikka ko‘ra, bunda tijorat banklari 1 mln 780 ming kishini ish o‘rinlari bilan qamrab olgan. Qishloq xo‘jaligida 959 ming, qurilishda 137 ming, investitsiya loyihalari hisobiga 168 ming aholi bandligi taʼminlangan.
2025-yil 8-avgustda prezident o‘tkazgan yig‘ilishda oliygohlar bitiruvchilarini ishga joylash masalasi ko‘tarilgan. Maʼlum qilinishicha, joriy yilgi 231 ming nafar bitiruvchidan 125 ming nafari ish topdi, deb hisobot berilgan. Aslida esa ishli bo‘lganlarning 42 ming nafari o‘zini o‘zi band qilgani aniqlangan.
Izoh (0)