Ijtimoiy tarmoqlarda Toshkentdan vodiyga ketishda Angren shahridagi ko‘prik qulab tushishi oqibatida yo‘l yopilgani haqida xabarlar tarqaldi. Holat yuzasidan Avtomobil yo‘llari qo‘mitasi izoh berdi.
Maʼlum qilinishicha, Qorabog‘soy ko‘prigi 1969-yilda “MSU-14 trest UZ moststroy” tomonidan qurib foydalanishga topshirilgan. 1995-yilda rekonstruksiya qilingan. Ko‘prik uch oraliqli sxemasi 3x22.2 m ulukli sxemada II toifali avtomobil yo‘liga mo‘ljallanib qurilgan.
“O‘zyo‘lko‘prik” klasterining Ko‘prik va sun‘iy inshootlarni diagnostika qilish bo‘limi mutaxassislari tomonidan Avtomobil yo‘llari qo‘mitasining murojaatiga asosan qisqa muddatda mazkur ko‘prikda o‘rganish ishlarini amalga oshirib, tegishli xulosani taqdim etgan.
Unga ko‘ra, ko‘prik konstruksiyasi texnik holati o‘rganilganda oraliq qurilma to‘sinlarining eskirgani, to‘sinlarning amaldagi yuklamalarni ko‘tara olmasligi, ko‘prik ustki qoplamasi qalinligi me‘yoridan ortib to‘sinlarga ortiqcha yuk berayotganligi, to‘sinlar o‘zaro yaxlit bo‘lmay, alohida element sifatida ishlayotganligi hamda ko‘prik ustki qoplamasidagi yoriqlardan va qatnov qismi qoplamasining chekka qismlaridan oqib tushgan suvlar to‘sinlarni butun tanasi bo‘ylab tarqalib, karroziyaga uchratayotganligi, to‘sinlardagi yoriqlardan suv sizib kirib, ishchi armaturalarini ham karroziyaga uchratayotganligi aniqlangan.
“Ko‘prikning umumiy texnik holati qoniqarsiz holatda deya baholanadi va kelgusida sodir bo‘lishi mumkin bo‘lgan avariya holatlarining oldini olish maqsadida ko‘prikda to‘liq rekonstruksiya ishlarini olib borish lozimligi, ko‘prik joylashgan avtomobil yo‘li I toifaga to‘gri kelganligi, ko‘prik gabariti avtomobil yo‘liga mos emasligi, avtomobillar harakatida aynan ko‘prik joylashgan oraliqda tirbandliklar hosil bo‘layotganligini inobatga olib, ko‘prik rekonstruksiya ishlari doirasida avtomobil yo‘li toifasiga va zamonaviy A 14, NK 100 me‘yoriy talablarga mos bo‘lgan yangi ko‘prikni qurish maqsadga muvofiqligi aytib o‘tilgan”, deyiladi xabarda.
13-may kuni taxminan soat 20:00 da Qorabog‘soy ko‘prigi chetidagi oxirgi oraliq qurilmasi, ya‘ni piyodalar yo‘lagi (bir dona oraliq qurilma balka 22.1 m) sinishi oqibatida ushbu yo‘nalish bo‘yicha avtomobillar harakati vaqtincha cheklanib, harakatlanish vaqtincha “Angren shahrini aylanib o‘tish” avtomobil yo‘liga o‘tkazilgan.
Izoh (0)