Qashqadaryo viloyat Avtomobil yo‘llari bosh boshqarmasi “Daryo”da e’lon qilingan “Toshkent—Termiz yo‘lining Dehqonoboddan o‘tgan qismi ta’miri quruvchilar ‘pulni yeb qo‘ygani’ uchun to‘xtab qolgan” sarlavhali xabarga e’tiroz bildirib, xalqaro yo‘lning 13 kilometri qurilishi quruvchilar “pulni yeb qo‘ygani” bilan bog‘liq emasligini ma’lum qildi.
Boshqarma bosh muhandisi Bo‘ri Fayziyevning “Daryo”ga ma’lumot berishicha, ushbu xabarda uning so‘zlari boshqacha talqin qilingan.
“Saytdagi xabarga ilova qilingan videomaterialda viloyat Avtomobil yo‘llari bosh boshqarmasi bosh muhandisi Bo‘ri Fayziyev savolga javob berish jarayonida quruvchilarning ‘pulni yeb ketgani’ haqida gapirmagan. Holbuki, ish bajarilmagan deganda ishni talablar darajasida bajarilmaslik yoki vaqtida bajarilmaslik kabi omillar ham tushuniladi”, — deyiladi boshqarmaning “Daryo”ga taqdim etgan munosabatida.
Boshqarma munosabatida aytilishicha, xalqaro yo‘lning Dehqonobod tumanidan o‘tgan qismini qurish uchun bosh pudratchi sifatida “Bekobodyo‘lsanoat” IChK va “Angren” BPIMB tanlab olingan.
“Quruvchilar tomonidan ishlar to‘g‘ri tashkil qilinmagani, korxonada yo‘l qurilishi ishlari uchun malakali mutaxassislar, muhandis-texnik xodimlar yetishmasligi oqibatida qurilish jarayonida davriy to‘xtalishlar doimiy ravishda bo‘lib turgan. Va oxir-oqibatda qayta qurish ishlari to‘xtab qolgan. Yuqoridagilardan xulosalanib buyurtmachi — ‘Umumiy foydalanishdagi avtomobil yo‘llarini qurish va rekonstruksiya qilish direksiyasi’ davlat unitar korxonasi bosh pudratchi korxonalar bilan tuzilgan pudrat shartnomalarini sud orqali tegishli tartibda bekor qilgan”, — deyiladi tashkilotning rasmiy bayonotida.
Ma’lumot berilishicha, xalqaro M39 avtomobil yo‘lining 1265-1291 va 1297-1315 kilometrlari oralig‘ini qayta qurish ishlari uchun 120 milliard so‘m ajratilgan. Bosh pudratchi korxonalar 2013—2017-yillar davomida yo‘l ko‘tarmasini qurish, sun’iy inshootlarni qurish va uzaytirish, yo‘l asosini qurish va ayrim yo‘l uchastkalarida qoplama ostini asfaltobeton qorishmasidan qurish ishlarini bajarib, ishning 35 foizini yakunlagan.
“Bajarilgan ishlar doimiy ravishda buyurtmachi tashkilot mutaxassislari va sinov laboratoriya vakillari tomonidan nazorat qilib borilgan hamda hujjatlari rasmiylashtirilib, to‘lovi vaqtida amalga oshirib borilgan. Qoldiq ish hajmlari moliyalashtirilmagan. Yuqoridagilardan xulosa qiladigan bo‘lsak, ish quruvchilarning ‘pulni yeb qo‘ygani’ uchun to‘xtab qolmagan. Balki, mutaxassislarning yetarli malakaga ega emasligi va ishga to‘g‘ri yondashilmagani sababli to‘xtab qolgan. Qilingan ish uchun mablag‘ to‘langan, qolgan mablag‘ esa buyurtmachi ixtiyorida turibdi”, — deyiladi tashkilot ma’lumotida.
“Daryo” muxbiri bilan telefon orqali muloqot qilgan boshqarma bosh muhandisi Bo‘ri Fayziyevning aytishicha, matbuot anjumanida bergan ma’lumoti uchun u Qurilish vazirligiga tushuntirish xati ham yozgan.
Izoh (0)