Qamchiq dovonida kuzatilgan sel-toshqin oqibatlari bartaraf etildi, deb xabar beradi FVV matbuot xizmati.
Ma’lum qilinishicha, 4-may kuni soat 21:30 larda Qamchiq dovonida kuzatilgan kuchli yog‘ingarchilik oqibatida Angren—Pop elektrlashtirilgan temiryo‘lining 19-kilometri “Ko‘l” stansiyasiga olib boruvchi avtomobil yo‘lining yuvilishi oqibatida poyezdni elektr quvvati bilan ta’minlovchi tayanch ustuni qulagan.
Yuzaga kelgan vaziyat oqibatlarini bartaraf etish maqsadida tezkor shtab tuzilib, Qamchiq MQYOQB va “O‘zbekiston temir yo‘llari” AJ maxsus avariya-tiklash brigadasi va muhandislik texnikalari bilan yo‘lda ta’mirlash ishlari olib borilib, elektr tayanch ustuni hamda yo‘l ostidan qo‘shimcha sel o‘tkazgich qurish ishlari amalga oshirilgan.
Shuningdek, avtomobil yo‘lida sel, toshqin oqibatlarini bartaraf etish va yog‘ingarchilik suvlarini betalofat o‘tkazib yuborish maqsadida suv o‘tkazish inshootlarini va kyuvetlarni tozalash tadbirlari olib borilgan. Dovon hududida hodisa oqibatlarini bartaraf etish tadbirlari davom etmoqda.
Avvalroq Surxondaryoda 40 ga yaqin xonadonni sel bosib, 230 dan ortiq kishi evakuatsiya qilingani, Sirdaryoda suv toshqini oqibatida 2 ta ko‘p qavatli uy butunlay yaroqsiz holga kelgani, Jizzaxda sel oqimida qolib ketgan ikki fuqaro ichki ishlar xodimlari tomonidan qutqarilgani to‘g‘risida xabar berilgandi.
Izoh (0)