Shavkat Mirziyoyev 26-dekabr kuni Sergeli tumani Qipchoq ko‘chasida qurilgan ko‘prikni ko‘zdan kechirdi, deya xabar bermoqda Prezident matbuot xizmati.
Mazkur ko‘cha Toshkent–Angren temiryo‘li bilan kesishgan. Buning ustiga tor bo‘lib, avtomobillar harakatiga qiyinchilik tug‘dirardi.
Shu bois Qipchoq ko‘chasi 6 qatorli qilib kengaytirilib, temiyo‘l ustidan o‘tuvchi 772 metrlik ko‘prik barpo etildi. Uning estakada qismi 445, eni 28 metrni tashkil etadi.
Davlat rahbari obyektning sifati, shaharda transport tizimini yaxshilashdagi ahamiyatiga alohida e’tibor qaratdi.
Ushbu ko‘prik soatiga 12 mingtagacha avtotransport vositalarini uzluksiz o‘tkazish imkoniyatiga ega. Eng muhimi, u poytaxtdagi ikkita yirik ko‘cha – Yangi Sergeli aylanma yo‘li bilan Toshkent halqa yo‘lini bog‘laydi. Bu haydovchilar uchun ancha qulaylik yaratadi, minglab transport vositalari oqimini o‘ziga olib, boshqa ko‘chalardagi tirbandlikni kamaytiradi.
“Pandemiya boshlanganda biz undan kuchli, qudratli bo‘lib chiqamiz deb maqsad qo‘ygan edik. Hammamiz ko‘ryapmiz dunyoda nimalar bo‘layotganini. Boshqa mamlakatlarda qurilishlar to‘xtab qolgan holatlar ham bo‘ldi. Xalqimiz tartib-intizom, birdamlik bilan barcha rejalarini ro‘yobga chiqarmoqda. Biz hamjihatlikda ko‘p narsalarga qodirmiz”, – dedi Shavkat Mirziyoyev toshkentlik faollar bilan suhbatda.
Prezident Shavkat Mirziyoyev 2020-yil 4-iyun kuni Toshkent shahrining Cho‘ponota ko‘chasi va Kichik halqa yo‘li kesishmasida quriladigan ko‘prik loyihasi bilan tanishgan edi. Kelgusida yangi yo‘l barpo etilib, Qipchoq ko‘chasidagi mazkur ko‘prikka tutashadi.
Shu yerda Turkiyaning Kalyon kompaniyasi bilan hamkorlikda poytaxtdagi avtomobil yo‘llarini rekonstruksiya qilish, transport va yo‘lovchilar harakati uchun qulayliklarni oshirish loyihalari muhokama qilindi.
Avvalroq Toshkent metropolitenining Sergeli yo‘nalishi ishga tushirilgani, Toshkentda Taxtapul mavzesidagi “tankodrom” ko‘prikning to‘xtab qolgan ta’miri bir oyga qolmay yakunlandi hamda Amudaryo ustida Xorazmni Qoraqalpog‘iston bilan bog‘lovchi 413 metrlik ko‘prik qurilishi boshlangani haqida xabar berilgandi.
Izoh (0)