Respublika transport prokuraturasi tomonidan 2020-yilda yo‘l va ko‘prik qurilish sohasida budjetdan ajratilgan pullarni o‘zlashtirish holati bo‘yicha 40 ga yaqin jinoyat ishi ochilgan. Ularda yo‘llar qurilishidagi korrupsion holatlar bo‘yicha 11,5 milliard so‘mlik davlat mulki talon-toroj etilgani fosh etildi. Bu haqda 3-fevral kuni AOKAda o‘tkazilgan matbuot anjumanida ma’lum qilindi, deya xabar berdi Bosh prokuratura matbuot xizmati.
Qayd etilishicha, 2020-yil davomida Transport prokuraturasi tomonidan har bir obyektga chiqib, yo‘llar ahvoli o‘rganilganda qator kamchiliklar borligi aniqlangan.
“Avvalo yo‘l va ko‘prik qurilishiga oid qonunchilik hamda ularni qurishda qo‘llaniladigan davlat standartlari, yo‘riqnoma va qoidalarni takomillashtirib, hozirgi zamonga moslashtirish zarurati yuzaga kelgan. Boisi hozirgi kundagi qurilishlar hanuzgacha Sobiq ittifoq davridagi standartlar asosida amalga oshirilmoqda.
Misol uchun, o‘sha paytlarda yo‘llar 14 tonnalik yuk mashinalariga moslashtirilgan bo‘lsa, bugungi kunda 80 tonnalik avtomobillar yo‘llarda yuribdi. Bu ham yo‘llar sifati tez buzilishi, ishdan chiqishiga olib kelmoqda. Transport prokuraturasi tomonidan bu borada tegishli takliflar berilganligi qayd etildi”, – deyiladi xabarda.
Shuningdek, matbuot anjumanida ko‘prik va yo‘llar qurilishida loyiha institutlari monopoliyasi tugatilgani, bundan buyon obyektlar ochiq tender savdolari orqali qurilishi ta’kidlangan.
Avvalroq Mirzo Ulug‘bek tumanida bank xodimi fuqarolarning 170 mln so‘m pensiya va nafaqa pullarini o‘zlashtirgani, Samarqandda maktab qurgan firmaning rahbarlari 631,7 mln so‘m mablag‘ni o‘zlashtirgani hamda Angren shahar obodonlashtirish boshqarmasi sobiq rahbari 638 mln so‘mni talon-toroj qilgani haqida xabar berilgandi.
Izoh (0)