Toshkent viloyatida 29 ta kichik va mikro gidroelektr stansiyalar quriladi, deb xabar bermoqda viloyat hokimligi axborot xizmati.
Unga ko‘ra, mazkur loyiha amalga oshirilishi uchun shahar va tumanlar hududidagi qishloq xo‘jaligiga mo‘ljallanmagan davlat zaxirasidagi 6,7130 gektar yer maydoni Energetika vazirligiga doimiy foydalanish huquqi bilan ajratildi.
Gidroelektr stansiyalar O‘zbekiston Respublikasi prezidentining 2022 yil 9-sentyabrdagi “Energiya tejovchi texnologiyalarni joriy qilish va kichik quvvatli qayta tiklanuvchi energiya manbalarini rivojlantirish bo‘yicha qo‘shimcha chora-tadbirlar to‘g‘risida” 220-sonli farmoni talablari asosida, Toshkent viloyati hokimining tegishli qarori bilan bitkazilib, foydalanishga topshiriladi.
Stansiyalar viloyatning Nurafshon, Chirchiq, Angren shahri hamda Chinoz, Parkent, Yangiyo‘l, Bo‘ka, Zangiota, Oqqo‘rg‘on, Ohangaron tumanlarida quriladi va loyiha quvvati 2 550 kVtni tashkil qiladi.
Shavkat Mirziyoyev Bo‘stonliq tumaniga tashrifi chog‘ida “Ugam-1” kichik gidroelektr stansiyasini ko‘zdan kechirgandi. Sohaga xorijiy investitsiya va xususiy sektorni jalb qilib, 2030-yilga qadar jami quvvatlarni 6 ming megavattga yetkazish belgilangan. Buning uchun huquqiy, iqtisodiy sharoitlar yaratilgan. Jumladan, mamlakat bo‘yicha ikki mingtagacha mikro va kichik GESlar qurish imkoniyati bor.
Izoh (0)