Davomiylikdan tashqari, seriallar rekordchi bo‘lishi mumkin bo‘lgan ko‘plab boshqa mezonlar ham mavjud. Ba’zi loyihalarning yutuqlari hatto Ginnes rekordlar kitobiga kiritilgan.
“Taxtlar o‘yini”
Serial Ginnesning rekordlar kitobiga “eng ko‘p mamlakatlarda bir vaqtning o‘zida namoyish etilgan teledastur” sifatida kiritildi— 5-mavsumning 2-qismi bir paytning o‘zida 173 mamlakatda efirga uzatilgan. Bundan uch yil oldin “Taxtlar o‘yini”ni kitobga kiritishga “qaroqchi” saytlar yordam berdi. Serial turli saytlardan yuklab olish bo‘yicha yetakchiga aylandi — “tarqatilgan” epizodlardan biri 1 kunda 13 million martadan ortiq yuklab olindi.
Aytishlaricha, ijodkorlar yana bir rekord uchun ariza topshirgan — televideniye tarixidagi bir seriyada eng ko‘p yonayotgan kaskadyorlar soni bo‘yicha. O‘shanda 73 nafar professional ishtirok etgan. Ginnes kitobi qo‘mitasi “rekord miqdordagi yondirilib yuborilgan odamlar uchun” nominatsiyasini joriy etishni rejalashtirmayotganini aytib, bu arizani rad etgan.
Qayd etilmagan bo‘lsa-da, baribir rekord: tilshunos Devid J. Peterson tomonidan yaratilgan xayoliy dotrakiy va valiriy tillarida 3000 dan ortiq mavjud bo‘lmagan so‘zlar bor edi. Khala tilini o‘rganishni istovchilar uchun esa loyiha ijodkorlari darslik va ushbu til bo‘yicha onlayn o‘quv kursini ishlab chiqishgan.
“Yo‘l ko‘rsatuvchi nur”
Serial televideniye tarixidagi eng uzoq davom etgan ko‘rsatuv bo‘ldi. Dastlab xayoliy Springfild cherkovida xizmat qilgan ruhoniyning hikoyalari asosida yaratilgan melodrama vaqt o‘tishi bilan 1952-yildan 2009-yilgacha bir-birini almashtirgan qahramonlar va ko‘plab oilalar bilan boyib bordi. Ikki ming qismdan iborat “Santa Barbara” 40 daqiqalik 18 262 ta epizodni o‘z ichiga olgan “Yo‘l ko‘rsatuvchi nur” bilan solishtirganda hech narsa emas.
Ammo bu faqat televideniyeda edi. 1937-yildan boshlab loyiha radioshou sifatida efirga chiqa boshladi va 15 yil davomida uzatildi.
“Doktor Kim”
Bu ilmiy-fantastik serial rekordchilar ro‘yxatiga kiritilmasa ham bo‘lmasdi. U ikki marta rekord o‘rnatgan: eng uzoq davom etgan ilmiy-fantastik loyiha sifatida — 1963-yildan beri 900 dan ortiq qism suratga olingan hamda eng muvaffaqiyatli loyiha sifatida — yuklab olishlar soni, disklar sotilishi va televideniyeda ko‘rsatish reytinglari tahlili asosida.
“Doktor Kim” bitta bosh qahramonni ijro etgan aktyorlar soni bo‘yicha ham rekord qo‘yishi ehtimoldan xoli emas. Bugungi kungacha ularning soni 14 taga yetgan.
“Doktor Haus”
Tibbiyot haqidagi mashhur serial ham Ginnesning rekordlar kitobiga kiritilgan. To‘qqiz yil davomida “Doktor Haus” serialini dunyoning 70 mamlakatida 80 milliondan ortiq kishi tomosha qilgan.
Serialning eng yuqori cho‘qqisi to‘rtinchi mavsumga to‘g‘ri keldi, shundan so‘ng tomoshabinlar soni asta-sekin kamaya boshladi. Xyu Lori sarkazm bilan to‘la shifokor roli uchun o‘zining birinchi (va ikkinchi) “Oltin globus” mukofotini qo‘lga kiritdi.
“Mashaqqatlar sari”
Saraton kasalligiga chalingan kimyo o‘qituvchisi haqidagi jinoiy drama ham tarixdagi eng muvaffaqiyatli loyihalardan biriga aylandi. Bunda Metacritic agregatori asos qilib olindi. Mashhurlikda undan qolishmaydigan Rotten Tomatoes saytida esa serial 96 foiz oldi.
Tomoshabinlar tanqidchilar bilan hamfikr bo‘lib, loyihani yuqori baholadi va 10 balldan deyarli 9 ball berdilar. Bundan tashqari, serial to‘rtta “Emmi”, bitta “Oltin globus”, uchta “Sputnik” va boshqa ko‘plab mukofotlarga sazovor bo‘ldi.
“Meni alda”
Doktor Laytman rolini mohirona aks ettirgan Tim Rot Ginnesning rekordlar kitobiga eng haqqoniy serial sifatida kiritilgan asar qahramoniga aylandi. Loyihaga asos bo‘lgan kitob muallifi, psixolog Pol Ekman ekranda ko‘rsatilganlarning 80 foizi haqiqat ekanini ta’kidladi. Bu fikrni ekspert xulosasi deb hisoblash mumkin: professor, darhaqiqat, ko‘p yillar davomida yolg‘on nazariyasi bo‘yicha eng yetuk mutaxassislardan biri sanaladi.
To‘g‘ri, u “Meni aldama” serialining qolgan 20 foizini to‘qima deb atadi, biroq boshqa seriallarga nisbatan unda haqiqat bir necha barobar ko‘proq aks etgan.
“Dekster”
Yomon odamlarni o‘ldiruvchi, bo‘sh vaqtida esa qon sachrashi bo‘yicha ekspert sifatida ishlaydigan seriyali qotil haqidagi serial eng qonli PR kampaniyasi uchun Ginnes rekordlar kitobidan munosib o‘rin egalladi. Reklamachilar o‘zlarining nozik didlarini ko‘rsatishdi: AQSHning 14 ta yirik shahrida favvoralarga sun’iy qon qo‘shib, aholi orasida vahima uyg‘otdilar.
“Dekster” seriali va uning spin-offlari muntazam ravishda ko‘rilish bo‘yicha ichki rekordlarni yangilab kelmoqda. Masalan, “Dekster. Yangi qon” seriali Showtime telekanali reytingida eng yuqori o‘rinni egallab, har bir qismi sakkiz milliongacha tomoshabinni o‘ziga jalb qildi. Serialning so‘nggi qismini bir vaqtning o‘zida uch million qurilmadan tomosha qilishdi.
“Sherlok Xolms”
Artur Konan Doylning adabiy asarlaridagi qahramon Ginnes rekordlar kitobiga eng ko‘p ekranlashtirilgan personaj sifatida kiritilgan. Hozirda mashhur izquvar haqida 210 dan ortiq film, serial va hatto animatsion loyihalar mavjud. Turli xil talqinlar esa hamon yaratilmoqda.
2025-yil yanvar oyida shu olamga oid “Uotson” seriali efirga uzatildi, 2025-yil aprel oyida esa “Sherlok va qizi” serialining premyerasi bo‘lib o‘tadi.
“Simpsonlar”
Mashhur “Simpsonlar” multfilmi bir necha bor rekordlar o‘rnatgan. U animatsion ko‘rsatuvlar orasida eng ko‘p “Emmi” mukofotini (34 ta) qo‘lga kiritgan, eng uzoq davom etgan animatsion sitkom (rekord o‘rnatilgan paytda 662 ta qism, hozirda 780 dan ortiq) bo‘lgan hamda televideniyedagi animatsion ko‘rsatuvlar orasida eng ko‘p taniqli mehmonlarni (810 ta mashhur shaxsni) taklif etgan.
Multserialning asosiy qahramonlaridan biri bo‘lgan Bart Simpson Time jurnali tomonidan tuzilgan “XX asrning eng ta’sirli 100 kishisi” ro‘yxatiga kiritilgan yagona multfilm qahramoni edi.
Izoh (0)