Ayni paytda Ko‘ksaroyda bo‘lib o‘tayotgan bir guruh turli soha vakillarini taqdirlash marosimida Prezident Shavkat Mirziyoyev ta’lim sohasi haqida so‘z yuritdi. Bu haqda “Daryo” muxbiri Mirolim Isojonov xabar bermoqda.
“Ko‘pchilik yaxshi biladi, oldinlari har kuzda o‘qituvchi va shifokorlarning uch oy umri dalada paxta terib o‘tardi. Maktabda 10 yil emas, 7,5 yil o‘qilardi. Birgina qaror bilan 7 million nafar terimchini dalalardan chiqarib oldik. Hozir hamma o‘z ishi bilan shug‘ullanyapti, paxtani esa kerak odam terib oladi.
Mamlakatimiz kelajagini ta’limda ko‘raman. Bilimi bor odam har qanday sharoitda yo‘lini topa oladi. Agar biz sifatli ta’lim bera olsak, farzandlarimizning kelajagidan xavotir olmasak ham bo‘ladi.
Besh yil oldin oliy ta’lim bilan qamrovimiz 9 foiz edi, bugungi kunda 29 foizni tashkil qilyapti. Ammo bu ko‘rsatkichdan hali xursand emasman. 50 foizgacha chiqarganimizdan keyin ko‘nglim to‘ladi. Ta’lim sifatini oshirishga bekorga katta ahamiyat bermayapmiz. Maktabgacha ta’lim vazirligi faoliyatini yo‘lga qo‘yganimiz bejiz emas. Xalq ta’limi sohasida ham izchil islohotlar qilyapmiz. Barchasi vaqti kelib, albatta, o‘z mevasini berishiga ishonaman.
Ikki yil avval Marhamatda IT-Park ochganimizda ko‘pchilik bu sohaning rivojlanishiga ishonmagandi. Hozir o‘sha parkdagi yigit-qizlar oyiga 3-4 ming dollargacha pul topishyapti. Bundan keyin ham IT sohasiga e’tiborimizni kuchaytiramiz”, — dedi Shavkat Mirziyoyev.
Eslatib o‘tamiz, shu yilning iyulida Shavkat Mirziyoyev oliy ta’lim muassasalarida ta’lim olish imkoniyatlarini kengaytirishga oid qarorni imzolagan. Shuningdek, O‘zbekistonda “temir daftar”dagi oilalarning har bir farzandiga o‘quv qurollari va maktab formasi sotib olish uchun 500 ming so‘mdan berilishi, O‘zbekistonda OTMga kirishda eng yuqori ball to‘plagan 200 nafar abituriyent uchun Prezident granti joriy etilgani hamda O‘zbekistonda ikki va undan ortiq farzandi to‘lov-shartnoma asosida o‘qiyotgan oilalarga imtiyozli ta’lim krediti berilishi haqida xabar berilgandi.
Izoh (0)