Jizzax viloyatida paleolit va neolit davrlariga oid yangi arxeologik maskanlar aniqlandi, deb xabar berdi Madaniy meros agentligi.
Maʼlum qilinishicha, 28-apreldan 6-maygacha G‘allaorol tumanida joylashgan Nurota tog‘ tizmasining shimoli-g‘arbiy qismida dala tadqiqot-qidiruv ishlari olib borilgan.
Tadqiqotlar jarayonida tarixiy ahamiyatga ega qator arxeologik manzillar aniqlandi. Jumladan, O‘gat qishlog‘ining g‘arbiy qismida so‘nggi paleolit davriga oid ibtidoiy kishilarning yashash makoni qayd etilgan. Izlanishlarning dastlabki tahlillari bu hududda ming yillar avval insonlar doimiy yoki mavsumiy istiqomat qilganini ko‘rsatgan.
Qoropchi qishlog‘ining shimoliy etaklarida esa neolit davriga mansub ikkita yangi makon aniqlandi. Topilgan manzillar insoniyatning dehqonchilik va chorvachilikka o‘tish davriga oid muhim maʼlumotlarni o‘z ichiga oladi.
Yonboshtut qishlog‘i shimolida joylashgan “Beshbuloq” nomli makon ham neolit davriga tegishli bo‘lib, bu yerda qadimgi jamiyatlarning ijtimoiy va madaniy hayotiga doir izlar topilgan.
Mazkur arxeologik topilmalar O‘zbekiston hududida eng ibtidoiy odamlarning yashash tarixini o‘rganishda muhim qadam bo‘lib xizmat qiladi. Tadqiqotlar hozirgi kunda ham davom ettirilmoqda. Kelgusida topilmalarning ilmiy tahlillari asosida kataloglar, maqolalar va ko‘rgazmalar tayyorlanishi rejalashtirilgan, deyiladi xabarda.
Ichanqal’ada qadimiy quduq topilgani va uning yoshi 150 da ekani taxmin qilinayotgani, Qo‘qondagi Jome majmuasida qadimiy tangalar topilgani, shuningdek, “Dasturxonchi” madrasasini ta’mirlash ishlari vaqtida ham qadimgi topilmalar — ko‘zalar topilgani to‘g‘risida xabar berilgan edi.
Izoh (0)