Har bir yirik shou, konsert yoki klip uchun yaratilgan sahna liboslaridan xonandalar kundalik hayotda foydalana olmaydi. Shu sababli mashhurlarning liboslari garderobda chang bosib yotmasligi uchun ulardan foydalanishning kreativ usullarini o‘ylab topadi.
Ledi Gaga “House of Gaga” nomli shaxsiy ko‘rgazmasini tashkil qilgan
Xonanda Ledi Gaga doim o‘zining g‘ayrioddiy obrazlari bilan muxlislarini hayratda qoldirib kelgan. 2010-yilda MTV Video Music Awards qizil yo‘lagida kiygan “go‘shtli” libosi buni isbotlaydi. 2019-yilda u eng noodatiy liboslarini jamlab, Los Anjelesda “House of Gaga” nomli ko‘rgazmada namoyish etdi. Gaga muxlislari 40 dan ortiq liboslarni jonli ko‘rish imkoniga ega bo‘lishdi. Masalan, Beyonse bilan birga ishlangan “Telephone” klipidagi tishli va mixli charm kurtka ham shular jumlasidan. Gaga liboslarni shunchaki saqlamaydi, balki ularni san’at asariga aylantiradi. Har bir obraz alohida bir hikoya haqida so‘zlaydi.
Rianna liboslarini London muzeyiga topshirgan
2023-yilda Londonning Viktoriya va Albert muzeyi zamonaviy aktrisalar va qo‘shiqchilarning afsonaviy liboslariga bag‘ishlangan ko‘rgazmani ochdi. Ekspozitsiya yulduzlaridan biri xonanda Rianna bo‘ldi, u o‘zining moda tarixiga kirgan liboslarini muzeyga topshirdi.
Liboslar orasida 2018-yil Met Gala tadbirida kiygan Rim Papasi uslubidagi dabdabali libosi va 200 mingta Swarovski toshlari bilan bezatilgan ko‘ylagi bor edi. Biroq Rianna muzeyga bitta noodatiy shart qo‘ydi — liboslarini suratga olish qat’iyan taqiqlangan bo‘lishi kerak edi. Buning sababini xonanda oshkor qilmagan.
Britni Spirs liboslarini sotib, zilzila qurbonlariga yordam berdi
2000-yillar pop malikasi Britni Spirs faoliyati davomida yuzlab sahna liboslarini to‘pladi. Kiyimlarni u xayriya auksionlariga topshirib, savdodan tushgan mablag‘ni ezgu ishlar uchun sarfladi. Masalan, 2011-yilda u Yaponiyadagi zilzila qurbonlariga moliyaviy yordam berdi.
Billi Aylish xayriya aksiyasida ishtirok etdi
Billi Aylish doimo xayriya loyihalarida ishtirok etadi va “bir martalik moda”ni keskin tanqid qiladi. Xonanda bu fikrlarini amalda ham ko‘rsatadi. 2019-yilda Glastonberi festivalidan so‘ng Billi bir nechta libosini Oxfam fondiga sovg‘a qildi.
2024-yilda u Charli XCX bilan birgalikda yozgan “Guess” treki uchun kiygan liboslarini sotib, tushgan mablag‘ni “I Support The Girls” xayriya tashkilotiga yo‘naltirdi. Bu tashkilot oilaviy zo‘ravonlikdan jabr ko‘rganlarga yordam beradi.
Keti Perri NFT yaratdi va muxlislariga syurpriz taqdim etdi
Keti Perri o‘zining yorqin liboslari bilan Ledi Gaga bilan bemalol raqobatchi bo‘la oladi. 2019-yilgi Met Gala tadbirida u kiygan “gamburger” kostyumi uzoq vaqt internetda muhokamada bo‘ldi. Keti ko‘rkam va yorqin liboslarni yaxshi ko‘radi, lekin hattoki Gollivuddagi katta garderoblar javoni bir kun emas bir kuni to‘ladi.
2021-yilda u liboslarini tartibga solishga qaror qilib, SADA investitsiya kompaniyasi bilan hamkorlikni yo‘lga qo‘ydi. Bu orqali Keti maxsus NFT’lar ishlab chiqdi (NFT (non-fungible tokens — o‘zaro almashinmas kriptografik tokenlar turidir) chiqardi. Ularning har biriga konsertlarda foydalanilgan haqiqiy liboslar biriktirilgan edi. Bu yangilik Keti Perri muxlislari uchun haqiqiy syurpriz bo‘ldi.
Izoh (0)