Shavkat Mirziyoyev dunyoda yuz berayotgan iqtisodiy tebranishlarning O‘zbekistonga ta’sirini yumshatish chora-tadbirlari yuzasidan videoselektor yig‘ilishida ayrim rahbarlar tadbirkorlarga to‘siq bo‘layotganini tanqid qildi.
“Takror va takror aytaman – ‘hozirgi dunyodagi vaziyat bizga ta’sir qilmaydi’ deganlar juda katta xato qiladi. Bunday sharoitda faqat o‘z kuchimiz va ichki imkoniyatlarimizga tayanib, dadil-dadil qadam tashlashimiz kerak”, dedi davlat rahbari.
Lekin ko‘p rahbarlar hali masalaning jiddiyligini, ikki karra ko‘p ishlash kerakligini bilmayotgani, har bir vazirlik, tarmoq va hududlarni birinchi rahbarlari aniq-aniq reja qilib, ishlab chiqarish, eksport bilan o‘zi shaxsan shug‘ullanishi shart va zarurligi ko‘rsatib o‘tildi.
Qayd etilishicha, bir hafta davomida mutasaddilar 3 mingdan ziyod tajribali tadbirkorlar bilan uchrashdi. Ishbilarmonlar xalqaro bozorlardagi tebranishlarga moslashish uchun tezda hal qilish kerak bo‘lgan yangi-yangi masalalarni qo‘ymoqda. Vazirlar, hokimlar, bank va tarmoq rahbarlariga savollar ko‘p.
Ayrim rahbarlar tendensiyalarni o‘rganib, xatarlarni to‘g‘ri baholab, tadbirkorlarga yo‘l ochish o‘rniga o‘zlari to‘siq bo‘layotganini tanqid qilindi. Prezident bundaylarga nisbatan qattiq chora ko‘rilishini aytdi.
Prezident hozirgi dunyo avvalgidek emasligini, uzoq yillar davomida davlatlar o‘rtasida barqaror munosabatlar va o‘zaro ishonchni ta’minlagan xalqaro institutlar, ular ishlab chiqqan qoida va normalar bugun samarasiz bo‘lib borayotganini aytib o‘tdi. Bu jarayonlar zanjirli ta’sir ko‘rsatib, jahon iqtisodiyotini sekinlashuvi va xalqaro savdoni kamayishiga olib kelishi mumkinligini qayd etdi.
Izoh (0)