Bugun, 11-aprel kuni xalqaro bozorda oltin narxi ilk bor 3 250 dollardan oshdi. Bu tarixiy rekord hisoblanadi. Narxlarning keskin ko‘tarilishiga savdo urushlari sabab global iqtisodiyotda yuz berayotgan zo‘riqishlar hamda ular keltirib chiqarayotgan xavotirlar turtki bermoqda. Qolaversa, bunga AQSH dollarining qadrsizlanayotgani ham ta’sir ko‘rsatyapti.
Comex birjasida iyun oyi fyucherslari 2,2 foizga oshib, bir unsiya uchun 3 246,2 dollarga yetdi. Savdolar chog‘ida narx 3 255,9 dollarni tashkil etdi – bu tarixiy rekord hisoblanadi.
Mutaxassislarga ko‘ra, AQSH valyutasining zaiflashuvi oltin narxining ko‘tarilishiga asosiy sabablardan biri bo‘lishi mumkin. DXY dollari indeksi 2022-yildan beri eng past ko‘rsatkichga tushib, 1 foizga pasaydi. Trading Economics agentligi bu holatni savdo urushi sabab xorijiy investorlar ishonchining pasayishi bilan izohlamoqda.
Hafta boshida AQSH ko‘plab davlatlar bilan bojlar bo‘yicha muzokaralar o‘tkazish uchun 90 kunlik tanaffus e’lon qilgan edi. Biroq bu Xitoyga nisbatan 145 foizga yetgan boj tariflari uchun taalluqli emas. Oq uyning mazkur qaroriga javoban Xitoy ham bojxona tariflarini 125 foizgacha oshirdi.
Tahlilchilarning aytishicha, ular o‘rtasidagi keskinlik global iqtisodiy inqiroz xavfini oshirmoqda. Shunday vaziyatda investorlar xavfsiz deb hisoblangan aktivlar, jumladan, oltinga sarmoya kiritishga intilmoqda.
“Biz oltin narxi o‘sishda davom etadi, deb hisoblaymiz. Taxminlarga ko‘ra, uning bahosi yaqin oylarda 3 400–3 500 dollarga yetishi mumkin”, dedi UBS tahlilchisi Jovanni Staunovo.
So‘nggi ikki yil ichida oltin narxi keskin oshdi: 2023-yil boshida bir troya unsiyasi 1 900 dollar atrofida bo‘lgan bo‘lsa, 2025-yil aprel oyiga kelib bu ko‘rsatkich ilk bor 3 250 dollardan oshdi.
Izoh (0)