AQSH prezidenti administratsiyasi Xitoy bilan hamkorlikni cheklaydigan davlatlarga nisbatan bojni kamaytirmoqchi. Bu haqda manbalarga tayanib, The Wall Street Journal xabar berdi.
Vashington bojlarni pasaytirish bo‘yicha muzokaralarda 70 dan ortiq davlatga shunday talab qo‘ymoqchi. Bu davlatlar o‘z hududida Xitoy kompaniyalarining faoliyat yuritishini va ular orqali tovar yetkazib berilishini taqiqlashi mumkin. Bundan tashqari AQSH uning savdo hamkorlari “Xitoydan arzon sanoat mahsulotlarini iste’mol qilishni” to‘xtatishini istaydi.
Bu boradagi talablar mamlakat va uning Xitoy iqtisodiyotiga jalb qilinganlik darajasiga qarab farqlanadi, deydi WSJ suhbatdoshlari.
Tegishli taklif maulliflaridan biri AQSH moliya vaziri Skott Bessentdir. Bu kabi choralar orqali u Xitoy iqtisodiyotini zaiflashtirish, uni yakkalash va AQSH bilan savdo urushida chekinishga majbur qilishni maqsad qilgan.
WSJ ma’lumotlariga ko‘ra, Bessent uchbu rejani Trampga 6-aprel kuni Floridadagi Mar-a-Lago qarorgohida bo‘lib o‘tgan uchrashuvda taqdim etgan. Keyinroq prezident Fox News telekanaliga Panama kanali haqida bergan intervyusida shunday strategiyaga ishora qilgan.
Xususan, u mamlakatlarni “AQSH va Xitoy o‘rtasida tanlov qilishga majburlash” imkoniyatini ko‘rib chiqishini aytgan. Tramp Pekinni savdo urushini hal qilish bo‘yicha muzokaralarni boshlash uchun u bilan bog‘lanishga chaqirdi.
Xitoy biz bilan bitim tuzishi kerak. Biz ular bilan bitim tuzishimiz shart emas. Xitoyga bizda mavjud bo‘lgan narsa — amerikalik iste’molchi kerak, deya AQSH prezidenti bayonotlarini yetkazgan Oq uy matbuot kotibi Karolin Livitt.
Trampning savdo urushi
2-aprel kuni AQSH prezidenti Donald Tramp barcha davlatlar uchun 10 foizlik asosiy tariflarni joriy qildi. Ular qatorida O‘zbekiston ham bor. Ammo bojlar har bir davlatning savdo balansiga qarab o‘zgardi. Xitoy bilan savdoda yirik defitsit mavjudligi bois AQSH bu mamlakat uchun tariflarni ancha yuqori darajaga ko‘tarib, 34 foizga yetkazdi.
Bunga javoban Pekin ham shuncha miqdorda Amerika tovarlariga bojlar soldi. Shundan so‘ng Tramp agar Pekin javob choralaridan voz kechmasa, bojlarni 50 foizgacha oshirish bilan tahdid qildi. Shu sababli bojlar 104 foizga oshdi.
Natijada Xitoy Amerika mahsulotlari uchun bojlarni 84 foizga oshirishini e’lon qildi. Mazkur e’lon ortidan Tramp Pekin uchun tariflar 125 foizga chiqishini aytdi, keyinchalik buni 145 foizga oshirdi. Xitoy mazkur tariflarga javoban stavkani 125 foizga ko‘tardi.
Xitoy AQSHni “o‘zaro bojlar”ni bekor qilishga va o‘zining noto‘g‘ri amaliyotini tuzatishga chaqirdi. XXR raisi Si Szinpin hech bir davlat “boj urushi”dan yutmasligini qayd etdi.
Izoh (0)