AQSH Suriyadagi sakkizta operativ bazasidan uchtasini yopadi va mamlakatdagi harbiylari sonini 2000 dan 1400 nafargacha qisqartiradi. Bu haqda Amerikaning ikki yuqori martabali amaldoriga tayanib The Associated Press xabar berdi.
Ma’lum qilinishicha, Mission Support Site Green Village, MSS Euphrates va yana bir kichikroq obyekt bazalari yopilmoqda. Amerikalik qo‘mondonlar 60 kundan keyin harbiylarni ko‘proq qisqartirish kerakmi yoki yo‘qligini hal qilishi kerak bo‘ladi.
Ekspertlar Suriyada kamida 500 nafar amerikalik askar qoldirishni tavsiya qilgan, biroq AQSH prezidenti Donald Tramp mamlakatda har qanday amerikalik askar qoldirilishiga “chuqur shubha bildirgan”, deb yozadi NYT.
Harbiylar soni kamayishiga qaramay, ular terrorizmga, xususan, ISHIDga qarshi kurashni davom ettirishi ta’kidlanmoqda. AQSH Suriyadagi qo‘shinlari sonini 2023-yil 7-oktyabrda HAMASning Isroilga hujumlaridan so‘ng oshirgan edi.
Isroil Suriyaning bosib olingan hududlarini tark etmaydi
AQSH ikki oy ichida Suriyadan o‘z qo‘shinlarini bosqichma-bosqich olib chiqishni boshlash niyati haqida Isroilni xabardor qilgan. Isroil rahbariyati Vashingtonni bu qarorni qayta ko‘rib chiqishga ko‘ndirishga harakat qilmoqda. Chunki amerikaliklarning ketishi Turkiyaning mintaqadagi mavqeining kuchayishiga olib kelishidan xavotirda. Biroq hozircha AQSH ma’muriyati o‘z so‘zida qat’iy turibdi, deb yozadi Ynet nashri
16-aprel kuni Isroil tashqi ishlar vaziri Israel Kats uning mamlakati G‘azo sektori, Livan va Suriyada egallab turgan hududlari ustidan harbiy nazoratni saqlab qolish niyatida ekanini aytdi.
Isroil mudofaa armiyasi ushbu “xavfsizlik zonalari”da qoladi va ularni yahudiy davlatini dushman kuchlaridan himoya qilish uchun buferga aylantiradi, degan Kats.
Izoh (0)