AQSHda demokrat senator Kori Buker prezident Donald Trampning siyosatini 25 soatdan ortiq tanqid qilib, eng uzun nutq rekordini o‘rnatdi. Bu haqda CNN xabar berdi.

Buker o‘z nutqida AQSH prezidentining ilk farmonlari, Grenlandiya va Kanadani qo‘shib olishga intilishlari oqibati haqida gapirgan. Demokrat shu tariqa 1957-yilda 24 soat-u 18 daqiqa nutq so‘zlagan marhum hamkasbi Strom Termondning rekordini yangilagan. Buker bayonotini jismoniy imkoniyati boricha davom ettirishga va’da bergan.
U “mamlakat inqirozda” ekani haqida ogohlantirgan, AQSH hukumati samaradorlik departamenti (DOGE) rahbari, milliarder Ilon Maskning federal hokimiyat ko‘lamini qayta ko‘rib chiqish bo‘yicha sa’y-harakatlarini tanqid qilgan. Shuningdek, millionlab amerikaliklar uchun asosiy sog‘liqni saqlash dasturlari qisqartirilishi mumkinligi haqida ogohlantirgan.
Qo‘shma Shtatlar prezidenti atigi 71 kun ichida amerikaliklar xavfsizligiga, moliyaviy barqarorlikka va demokratiyamizning asosiy poydevorlariga shunchalik ko‘p zarar yetkazdi. Hozir Amerika uchun odatiy davrlar emas. Shuning uchun AQSH Senatida bu holat oddiy deb qaralmasligi kerak, dedi Buker.
U nutqiga qanday tayyorgarlik ko‘rganini ham so‘zlab berdi. Demokratning aytishicha, hojatxonaga qatnamaslik uchun nutq arafasida ovqatlanish va ichishni to‘xtatgan.
Yengishim kerak bo‘lgan eng qiyin narsa shundaki, mushaklar tortisha boshladi va vaqti-vaqti bilan spazmlar yoki shunga o‘xshash narsalar paydo bo‘ldi, degan u.
Izoh (0)