UFC matbuot xizmati 26-iyul kuni Abu-Dabida (BAA) bo‘lib o‘tgan UFC on ABC 9 musobaqasi natijalari asosida sportchilarning yangilangan reytingini e’lon qildi. Unga ko‘ra, o‘zbekistonlik aralash jang san’ati ustasi Bogdan Guskov yarim og‘ir vazn toifasida kuchli o‘n nafar sportchi qatoriga kirdi.
Guskov Abu-Dabida o‘tgan turnirda rossiyalik Nikita Krilovni birinchi raunddayoq texnik nokaut evaziga mag‘lub etdi. Ushbu g‘alabadan so‘ng, u yarim og‘ir vazn toifasi reytingida uch pog‘onaga ko‘tarilib, 10-o‘rinni egalladi. Krilov esa ikki pog‘onaga pastlab, 12-o‘ringa tushib ketdi.
Shuningdek, ushbu oqshomning asosiy janglaridan biri — o‘rta vazn toifasidagi bahsda oktagonga chiqqan niderlandiyalik Renye de Ridder avstraliyalik Robert Uittaker ustidan hakamlar qarori bilan g‘alaba qozondi. Ushbu g‘alabadan so‘ng, de Ridder reytingda sakkiz pog‘onaga ko‘tarilib, 5-o‘rinni egalladi. Uittaker esa ikki pog‘onaga pastlab, 7-o‘ringa tushib ketdi.
Ma’lumot uchun, Bogdan Guskov UFC promousheni doirasida hozirgacha 5 ta jang o‘tkazib, shulardan 4 martasida g‘alaba qozongan bo‘lsa, 1 bahsda mag‘lubiyatga uchragan. O‘zbekistonlik aralash jang san’ati ustasi ketma-ket to‘rtinchi jangini muddatidan avval yakunlab, o‘ziga xos natijani qayd etgan.
Izoh (0)