O‘zbekiston prezidenti Shavkat Mirziyoyev 3-aprel kuni “Markaziy Osiyo — Yevropa ittifoqi” birinchi sammiti doirasida Yevropa komissiyasi prezidenti Ursula fon der Lyayen bilan suhbat o‘tkazdi.
Prezident matbuot xizmatining ma’lum qilishicha, unda O‘zbekiston va YI o‘rtasidagi o‘zaro manfaatli hamkorlikni yanada kengaytirish istiqbollari yuzasidan fikr almashildi. 4-aprel kuni bo‘lib o‘tadigan mintaqalararo sammit va iqlim forumini o‘tkazish masalalari ko‘rib chiqildi.
Yevropa komissiyasi prezidenti Ursula fon der Lyayen sammitda ishtirok etish uchun 2-aprel kuni O‘zbekistonga kelgandi. Yevrokomissiya Samarqandda bo‘lib o‘tadigan “Yevropa ittifoqi—Markaziy Osiyo” sammitini Yevropa ittifoqining chet el hamkorlari bilan savdo aloqalarini xilma-xillashtirish strategiyasi doirasida AQSH bojxona to‘lovlariga Yevropaning javobi elementlaridan biri sifatida ko‘rmoqda. Bu haqda Yevrokomissiya rahbari Ursula fon der Lyayen Strasburgdagi Yevroparlament sessiyasida aytib o‘tgandi.
“Markaziy Osiyo—Yevropa ittifoqi” birinchi sammiti haqida
Ushbu sammit Samarqand shahrida 3—4-aprel kunlari bo‘lib o‘tadi. Shavkat Mirziyoyev raisligida o‘tadigan sammit ishida Yevropa kengashi prezidenti Antoniu Koshta, Yevropa komissiyasi prezidenti Ursula fon der Lyayen, Qozog‘iston respublikasi prezidenti Qosim-Jo‘mart To‘qayev, Qirg‘iz Respublikasi prezidenti Sadir Japarov, Tojikiston prezidenti Emomali Rahmon va Turkmaniston prezidenti Serdar Berdimuhamedov ishtirok etadi.
“Markaziy Osiyo—Yevropa ittifoqi” birinchi sammitining ishbilarmonlik dasturi Shavkat Mirziyoyev va Yevropa tiklanish va taraqqiyot banki prezidenti Odil Reno-Basso bilan uchrashuvidan boshlandi. 3-aprel kuni sammitda ishtirok etadigan yana bir qator delegatsiyalar rahbarlari bilan qator ikki tomonlama muzokaralar o‘tkazilishi rejalashtirilgan. 4-aprel kuni Markaziy Osiyo davlatlari va Yevropa ittifoqining asosiy institutlari rahbarlari ishtirokida ko‘p tomonlama tadbirlar bo‘lib o‘tadi.
Izoh (0)