Vyetnam AQSH prezidenti Donald Tramp ma’muriyati tomonidan Vyetnam tovarlariga bojxona to‘lovlarini joriy etish xavfini kamaytirish maqsadida mamlakat bosh vaziri o‘rinbosari Xo Dik Fok boshchiligidagi yuqori martabali delegatsiyani AQSHga yubormoqda. Bu haqda Bloomberg axborot agentligi xabar bermoqda.
AQSH ommaviy axborot vositalari so‘nggi paytlarda Vashington ikki mamlakat o‘rtasidagi savdo aylanmasida Vyetnam foydasiga sezilarli nomutanosiblik tufayli Vyetnam tovarlariga yuqori import bojlarini joriy etishi mumkinligi haqida bir necha bor xabar bergan.
“Bosh vazir o‘rinbosari Xo Dik Fok Vietnam Airlines, Vietjet Aviation va VinaCapital Group kabi kompaniyalar rahbarlari hamrohligida Nyu Yorkdagi ishbilarmonlik uchrashuvida ishtirok etadi”, deyiladi agentlikning kun tartibi haqidagi ma’lumotga asoslangan xabarida.
Ta’kidlanishicha, Vyetnam delegatsiyasi Amerika Boeing kompaniyasi hamda Amerika banklari vakillari bilan ham uchrashadi.
Agentlik ma’lumotlariga ko‘ra, delegatsiyaning yuborilishi Vyetnam ning AQSH bilan savdo aylanmasidagi katta tafovutni kamaytirish niyatini bildiradi. Hozirda Vyetnam tovarlarining AQSHga eksporti hajmi Amerika mahsulotlarining Vyetnam ga importidan sezilarli darajada yuqori.
“Vyetnam dunyodagi savdoga eng ko‘p bog‘liq davlatlar qatoriga kiradi va AQSHni o‘zining eng muhim savdo hamkori deb hisoblaydi”, deya ta’kidlaydi Bloomberg.
Fevral oyida AQSH prezidenti Donald Tramp mamlakatga chet eldan kiritiladigan barcha po‘lat va alyuminiy mahsulotlariga 25 foizlik bojxona to‘lovlarini joriy etishini e’lon qilgan edi. Mart oyida esa Tramp chet elda ishlab chiqarilgan avtomobillar uchun 25 foizlik yangi boj 2-apreldan kuchga kirishini ma’lum qilgandi.
Izoh (0)