O‘zbekistonda bojxona ombori rejimida saqlash muddati o‘tgan tovarlar 90 kun ichida talab qilib olinmagan hollarda ular sud qarori asosida davlat egaligiga o‘tkaziladi hamda qonunchilik hujjatlarida belgilangan tartibda tasarruf etiladi. Bu haqda “Davlat bojxona xizmati organlarining faoliyati samaradorligini oshirish bo‘yicha chora-tadbirlar to‘g‘risida”gi prezident farmonida belgilandi.
Farmonga asosan, davlat bojxona xizmati organlari faoliyati samaradorligini oshirishning asosiy maqsadli ko‘rsatkichlari quyidagilar etib belgilandi:
- 2030-yilga qadar Jahon bankining Logistika samaradorligi indeksida (LPI) bojxona rasmiylashtiruvi samaradorligi ko‘rsatkichi bo‘yicha O‘zbekistonning o‘rnini 55-pog‘onadan past bo‘lmagan darajaga ko‘tarish;
- 2026-yilga qadar bojxona deklaratsiyalarini inson omilisiz rasmiylashtiruv ulushini 2 barobarga oshirish;
- 2028-yilga qadar bojxona ko‘rigini 21 foizdan 15 foizga tushirish;
- 2030-yilga qadar sun’iy intellekt elementlaridan foydalangan holda xavfni boshqarish tizimi samaradorligini 2 barobarga oshirish.
Tashqi iqtisodiy faoliyatda bir qator qulayliklar yaratiladi.
2025-yil 1-iyuldan veterinariya va fitosanitariya sohasida tashqi savdo yuklariga tegishli har qanday hujjatlarga muhr va shtamp bosish hamda ularni yozma tarzda ro‘yxatga olish amaliyoti bekor qilinadi, barcha tartibotlar ushbu hujjatlarni elektron shaklda tasdiqlash orqali amalga oshiriladi (tovarlar eksportida xalqaro shartnomalarda qat’iy belgilangan holatlar bundan mustasno).
2025-yil 1-sentyabrdan tadbirkorlik subyektlariga bojxona to‘lovlari va bojxona rasmiylashtiruvi uchun boshqa turdagi to‘lovlarni respublikaning istalgan hududidan amalga oshirish imkoniyati yaratiladi, buning uchun yagona g‘azna hisobvarag‘i ochiladi.
2025-yil 1-noyabrdan o‘tkazish punktlari orqali harakatlanayotgan yo‘lovchilarga qulaylik yaratish maqsadida yo‘lovchi bojxona deklaratsiyasining mobil ilovasi amaliyotga joriy etiladi.
2025-yil 1-dekabrdan bojxona hududida yoki hududidan tashqarida qayta ishlash rejimlarida bojxona yuk deklaratsiyalarini soddalashtirilgan tartibda rasmiylashtirish imkonini beruvchi “Tolling operatsiyalari” moduli amaliyotga joriy etiladi.
2025-yilda bojxona sohasini rivojlantirishning asosiy maqsadlari etib quyidagilar belgilandi:
- sohaga sun’iy intellekt texnologiyalarini joriy etish;
- bojxona organlari axborot tizimlarini takomillashtirish va samaradorligini oshirish;
- bojxona organlari tashkiliy tuzilmalarini optimallashtirish.
Bojxona qo‘mitasi tizimida Bojxona rasmiylashtiruvi markazi tashkil etiladi. Bunda hududiy boshqarmalarning masofaviy elektron deklaratsiyalash bojxona postlari bosqichma-bosqich tugatiladi.
Bojxona qo‘mitasi tarkibida bojxona sohasiga sun’iy intellekt texnologiyalarini joriy etishga ixtisoslashgan tuzilma tashkil etiladi. Tuzilmaning asosiy vazifalari etib quyidagilar belgilandi: sun’iy intellekt texnologiyalari sohasida ilg‘or xorijiy davlatlar tajribalarini o‘rganish, bojxona nazorati va rasmiylashtiruvini qamrab olgan sun’iy intellekt texnologiyalarini tadqiq qilish, ularning samarali ishlashini ta’minlash hamda doimiy tarzda sifat jihatdan yangi bosqichga olib chiqish choralarini ko‘rish.
14-mart kuni prezidentning “Mahsulotlar eksporti tartib-taomillarini takomillashtirish va qo‘shilgan qiymatga ega tayyor mahsulotlar ishlab chiqarishni rag‘batlantirish chora-tadbirlari to‘g‘risida” farmoni qabul qilingandi. Farmon bilan 86 turdagi tovarga eksport bojxona bojlari joriy qilindi.
Izoh (0)