O‘zbekiston Superligasining 3-turidan o‘rin olgan bahsda Namanganning “Navbahor” jamoasi o‘z maydonida “Andijon”ni qabul qildi. “Vodiy derbisi” doim keskin va murosasiz kurashlar ostida kechgan, ushbu bellashuv ham bundan mustasno bo‘lmadi. O‘yinda emotsiyalar, maydondan chetlatishlar, avtogollar, futbolchilar o‘rtasida dahanaki janglar, bir so‘z bilan aytganda, barchasi yuz berdi.
O‘yinning 2-daqiqasidayoq Sergey Lushan shogirdlari standart vaziyatdan so‘ng hisobni ochishga muvaffaq bo‘ldi. Biroq namanganliklarning quvonchi uzoqqa cho‘zilmadi. Oradan 4 daqiqa o‘tar-o‘tmas, mehmonlar hisobni tenglashtirdi. Mashukovning darvoza tomon yo‘llagan to‘pini mezbonlarning braziliyalik himoyachisi Gilyerme Gedesh kutilmaganda o‘z darvozasiga kiritib qo‘ydi – 1:1.
Ikkinchi 45-daqiqalikni hujumkor tarzda boshlagan “lochinlar”ning 51-daqiqadagi hujumi gol bilan yakunlandi. Shohmalik Komilovning uzatmasini Abbos G‘ulomov samarali tarzda yakunlab, “Navbahor”ni yana hisobda oldinga olib chiqdi – 2:1.
Uchrashuvning 72-daqiqasida Shohmalik Komilovga nisbatan qo‘pollik ishlatgani bois andijonliklarning bosniyalik yarim himoyachisi Mirzad Mexanovich maydondan chetlatildi. Natijada “burgutlar” maydonda 10 kishi bo‘lib qoldi.
Uchrashuvning asosiy vaqtiga hakam tomonidan qo‘shib berilgan daqiqalar davom etayotgan paytda “Navbahor” himoyachisi Saidazamat Mirsaidov ikkinchi marta ogohlantirilib, maydondan chetlatildi hamda mezbonlar ham maydonda bir kishi kam bo‘lib qoldi.
“Andijon” 90+8-daqiqada standart vaziyatdan so‘ng muvozanatni tikladi. Islom Mamatkazinning zarbasidan so‘ng to‘p nigeriyalik yarim himoyachi Benjamin Teydiga tekkan holda darvoza to‘ridan joy oldi – 2:2. Shu tariqa “vodiy derbisi”da jangovar durang qayd etildi.
“Daryo” “Navbahor” va “Andijon” jamoalari o‘rtasidagi o‘yindan fotogalereya tayyorladi.



























Izoh (0)