Serbiyaning Nish shahrida boks bo‘yicha ayollar o‘rtasidagi jahon chempionati o‘z yakuniga yetdi. Unda O‘zbekiston terma jamoasi muvaffaqiyatli ishtirok etib, o‘z tarixida ilk bor 1 ta kumush va 3 ta bronza medallariga sazovor bo‘ldi. Bu haqda Milliy Olimpiya qo‘mitasi matbuot xizmati xabar berdi.
8—17-mart kunlari Serbiyaning Nish shahrida bo‘lib o‘tgan jahon chempionatida O‘zbekiston sharafini 12 nafar bokschi qizlar himoya qildi. 48 kg vazn toifasida Farzona Fozilova, 50 kg vazn toifasida Sabina Boboqulova va 52 kg vazn toifasida Feruza Kazakova musobaqa bronza medallariga ega chiqdi.
-66 kg vazn toifasida ringga ko‘tarilgan Navbahor Hamidova ikkinchi o‘rinni egallab, kumush medalni qo‘lga kiritdi. O‘zbekistonlik bokschi final jangida Olimpiada va jahon chempioni, turkiyalik Busenaz Surmenliga imkoniyatni boy berdi. Shunday bo‘lsa-da, u kattalar o‘rtasidagi dunyo birinchiliklarining finalida ringga ko‘tarilgan birinchi o‘zbekistonlik bokschi qizga aylandi.
Musobaqada medallar qo‘lga kiritgan sportchilar:
Kumush medal:
-66 kg: Navbahor Hamidova
Bronza medal:
-48 kg: Farzona Fozilova
-50 kg: Sabina Boboqulova
-52 kg: Feruza Kazakova
Izoh (0)